УИХ-ын гишүүн Ж.Батзандан баривчлагдаж нутаг буцсан 800 хятад болон Түр хорооны хуралдааны талаар мэдээлэл хийлээ.

Тэрбээр энэ талаар “Аравдугаар сарын 12-15-ны хооронд Хуан гэх нэртэй хятад хүн Засгийн газрын  Шадар сайдтай уулзсан байна. Энэ үед Алтанбулаг, Цагааннуурын чөлөөт бүсийн дарга нар хамт байжээ. Алтанбулаг, Цагааннуурын чөлөөт бүсэд цахим казино ажиллуулах зорилгоор Засгийн газрын өндөр албан тушаалтнууд хятадуудыг хүлээн авч уулзаж, Монгол Улсын чөлөөт бүсэд цахим казино байгуулж болно. Та бүхэн ирж туршилт хий гэдэг хүсэлт тавьсан байна.

Сая албадан гаргасан 800 хятад Камбож улсаас хөөгдөж ирсэн юм байна. Зүүн өмнөд азийн улсууд цахим казино ажиллуулж байгаад цахим тоглоом нэртэй гэмт хэрэг болохыг тогтоож үйл ажиллагааг нь зогсоосон байдаг юм байна. Өөрөөр хэлбэл, цахим покер зэрэг янз бүрийн тоглоом тоглодог. Жинхэнэ хүмүүс орж ирж тогловол нөгөө талд хуурамч хаягтай нэг бүлэглэлийн хүмүүс нийлж хүмүүсийн мөнгийг луйварддаг ийм үйл ажиллагаа явагдахаар Монголд орж ирсэн нь тогтоогдсон байна. Одоогийн байдлаар 800 Хятадыг оруулж ирсэн хэргээр цагдан хорих 461 дүгээр ангид Уулаа, Баяраа гэх хоёр хүн хоригдож байна.

Нийт 53 халхавч компани байгууллага байгуулж, Гадаад харилцааны яам, Тагнуулын ерөнхий газарт хүсэлт гаргаж жуулчин нэрээр орж иржээ. Зарим хүмүүс жуулчны визийг Консулын газар өгдөг гэж буруу яриад байгаа. Жуулчны визийг тусгай компаниудад хүсэлт гаргаж, уг хүсэлтийн дагуу Гараад харилцааны яам код олгож үүнд үндэслэн Эрээн, Бээжин, Хөххотын Консулын газар визийн зөвшөөрөл өгдөг.

Би хэд хоног ажиглалаа. Нэлээд судалгаа хийлээ. Хуан гэгч нь баривчилгаа болохын өмнөх долоо хоногт Хятад руу явжээ. Тэрбээр Замын-Үүдээс зугтаж гарах гэж байгаад баригдсан байна. Тагнуулын ерөнхий газрын дарга болон Гадаад харилцааны яам энэ асуудлыг анхнаас нь мэдэж байсан. Энэ ажиллагаа оруулж ирэхдээ ч , гаргахдаа ч зохион байгуулалттай болсон байна. Энэ асуудлаар Ерөнхийлөгчтэй уулзсан. Мөн Л.Болд гишүүний санаачилгаар ҮАБЗ-ийн хуралдааныг явуулж, сонслоо. Нууцын асуудал, мөрдөн шалгах ажиллагаа явагдаж байгаа тул мэдээлэл гаргаж болохгүй талаар хууль сануулж байгаа. Гэхдээ энэ нууцыг хадгалаад байх юм бол буруу мэдээлэл явах нь ээ. Тиймээс энэ мэдээллийг засах зорилгоор зориуд хийж байна.

Хоёрдугаар, мөн нууцын зэрэглэлтэй асуудал байгаа. Тухайлбал, Б.Хурц генерал Баянзүрх дүүргийн Иргэний хэргийн шүүхэд намайг нэр хүндийг  нь доромжилсон, сэргээж өгнө үү гэсэн гомдлыг шүүхэд өгсөн. Үүнтэй холбогдуулан сүүлийн үед хуурамч мэдээлэл явлаа.

Ж.Батзандан Б.Хурцаас уучлалт гуйх шийдвэр гаргалаа гэж. Ингэхдээ Баянзүрх дүүргийн шүүх шийдвэрийнхээ нэгдүгээр мөрөнд няцаалт хий гэсэн. Гэтэл хоёрдугаар мөрөндөө няцаалт хийх шаардлагагүй гэж бичсэн байна. Би энэ шийдвэрийг өчигдөр гар дээрээ авлаа. Эндээс үзэхэд шүүх нэгдүгээр мөрөндөө Б.Хурцад долигнох гэж гаргасан. Хоёрдугаар мөр нь үнэнийг илчилсэн шийдвэр гэж ойлгож байгаа. Ийм утгагүй шийдвэр байна.

Б.Хурц генерал Герман, Францаас Монгол Улсын иргэн Д.Энхбатыг хулгай хийж авчирсан гэж гүтгэсэн юм байна. Шүүх үүнийг судалж үзээд энэ бол гүтгэлэг биш. Уучлалт гуйх шаардлагагүй гэжээ. Хоёрдугаарт, яаж гүтгэсэн гэхээр Б.Хурц Ч.Сайханбилэгийн Засгийн газрын үед Эрдэнэтийн 49 хувийг хуйвалдаж, Худалдаа хөгжлийн банкинд авч өгөх зохион байгуулсан хүний нэг гэж би хэлсэн. Үүнд уучлал гуйх шаардлагагүй гэж шүүх үзжээ. Учир нь Б.Хурц Цензургүй яриа нэвтрүүлэгт оролцохдоо би үүнийг зохион байгуулахад оролцсон гэж өөрөө хэлсэн.

Гуравдугаарт, Б.Содномдаржаа, Т.Чимгээ нарыг эрүүдэн шүүж хэргийг хүчээр тулган хүлээлгэж, үүнийхээ төлөө Ц.Элбэгдоржоос генерал цол хүртсэн гэж би хэлсэн юм. Өнөөдрийг хүртэл олон ААН-ийг дээрэмдэж тоносныхоо төлөө, гэмгүй хүнийг эрүүдэн шүүснийхээ төлөө генерал цол авсанд нь итгэлтэй байдаг. Учир нь Б.Хурц бол генерал цол хүртэх ямар ч үндэслэлгүй. Барилгын ТМС төгссөн хүн шүү дээ. Цэрэгт ч явж үзээгүй, тамхины наймаа хийж байсан эрүүгийн гэмт хэрэгтэнд генерал цол олгож болохгүй гэдэг хатуу байр суурьтай байгаа шүү.

Түүнчлэн өчигдөр Түр хороо хуралдаж, тагнуул, прокурор байгууллагын дарга, удирдлагуудыг сонссон. Мөн Б.Содномдаржаа, Т.Чимгээ нарын өмгөөлөгчидтэй уулзсан. Энэ үеэр нэг чухал шийдвэр гаргалаа. Эрүүгийн байцаан шийтгэх хуулиар шинээр илэрсэн нөхцөл байдлыг үндэслэж, прокурорт хохирогчийн тал хүсэлт гаргаж, прокурор шинээр илэрсэн нөхцөл байдлыг үндэслэж хүчингүй болгуулах, хэргийг мөрдөн шалгалтад буцаах хүсэлтийг прокурор явуулах эрхтэй. Өнөөдөр ХЭҮК Б.Содномдаржаа, Т.Чимгээ нарыг эрүүдэн шүүсэн гэдгийг тогтоочихсон. Хүний эрхийн комисс бол хүний эрхийн зөрчлийг тогтоодог цорын ганц байгууллага. ОУПХ, Түр хорооны шийдвэр дүгнэлт мөн гарсан. Эрүүдэн шүүсэн асуудлыг тухайн үеийн гурван шатны шүүхийн шүүгчид мэдээгүй байсан учраас ял өгчихсөн гэж яриад байгаа. Эдгээр шийдвэрийг үндэслэн хохирогчийн өмгөөлөгч нар прокурорт хүсэлт гаргаж, прокурор шүүх рүү дүгнэлт явуулах боломжтой гэсэн” гэлээ.  

Б.Лхам