МХЕГ-аас олон улсын хөтөлбөртэй сургуулиудад хийгдсэн хяналт шалгалт, илэрсэн зөрчил болон Улсын хэмжээнд мал төхөөрөх, мах, махан бүтээгдэхүүн боловсруулах үйлдвэрүүдэд хийгдсэн хяналт шалгалтын талаар мэдээлэл хийлээ.
МХЕГ-ын Хөдөө аж ахуйн хэлтсийн дарга Д.Батжаргал “Мэргэжлийн хяналтын газар 2019 оны гүйцэтгэлийн төлөвлөгөөний дагуу мах боловсруулах, төхөөрөх үйлдвэрүүдэд хяналт, шалгалтын ажил хийсэн. Шалгалтад улсын хэмжээнд 244 үйлдвэр хамрагдсан. Үүнээс мал төхөөрөх 97 үйлдвэр хамрагджээ. Гарсан гол зөрчлүүд мал эмнэлгийн гарал үүслийн гэрчилгээ, ариутгал халдваргүйжүүлэлт, ариун цэврийн шаардлага нөхцөл хангагдаагүй гэсэн зөрчлүүд дийлэнх нь байна. Мөн 14 орчим үйлдвэрийн үйл ажиллагааг зогсоосон. Тухайлбал, Налайх дүүрэгт “Шижир галт”, Чингэлтэй дүүрэгт “Ариун Эрдэнэ мах” зэрэг үйлдвэрүүдийг тодорхой хугацаанд зогсоож, биелэлтийг хангуулж нээсэн” гэлээ.
МХЕГ-ын Боловсрол соёлын хяналтын хэлтсийн дарга М.Нямсүрэн “Шалгалтад 10 сургуулийг хамруулсан. Өмнө нь Мэргэжлийн хяналт шалгалтад ороогүй сургуулиудыг түүвэрлэж оруулсан. Тус сургуулиудын тусгай зөвшөөрөл нь энгийн хөтөлбөртэй ч олон нийтэд кембриджийн хөтөлбөртэй гэж ойлгуулдаг. Ийм нийтлэг зөрчил илэрч байна. Хоёрдугаарт, ААН-ийн гэрчилгээ компанийн нэр дээр, сургууль нь өөр нэртэй, байршил нь өөр хаяг дээр сургалт явуулж байгаа асуудал илэрсэн. Кембриджийн хөтөлбөртэй сургалтыг тухайн улсаас нь зөвшөөрөл авсан, зориулалтын барилга, сертификаттай, сургалтыг явуулах багштай байх ёстой. Манай улсад Улаанбаатар Элит, British school, Орчлон, Орхон Хасуй зэрэг сургууль кембриджийн сургалттай үйл ажиллагаа явуулдаг. Гэтэл шинээр байгуулагдаж ихэнх байгаа сургуулиуд өөрсдийгөө ийн нэрлэж иргэдийг төөрөгдүүлж байна. Мөн зориулалтын биш түрээсийн байшинд сургалтын үйл ажиллагаа явуулж байсан. Олон улсын хөтөлбөртэй сургуулиудын талаарх мэдээллийг БСШУСЯ нээлттэй байлгах ёстой. Уг нь жил бүр сургалтын талаар статистик мэдээлэл гаргадаг ч олон улсын хөтөлбөртэй сургуулиудын талаарх мэдээлэл байхгүй байгаа учраас энэ талаарх мэдээлэл хаалттай байна гэж үзэж байна” гэв.
Б.Лхам
