ҮХЦ-ийн дарга асан Д.Одбаярыг БНСУ-д амьдарч буй монголчуудаас уучлалт гуйхыг “Ялгаварлалыг хариуцлагажуулъя нэгдэл”-ээс шаардлаа.

Тодруулбал, Д.Одбаяр нь Улаанбаатарааас Сөүлийн чиглэл рүү нисэх үедээ согтууруулах ундаа хэрэглэн зохисгүй байдал гаргаж, онгоцны үйлчлэгчийн биед халдаж, бэлгийн дарамт учруулсан шалтгаанаар саатуулагдаж, тус улсын хуулиар торгуулсан.

Үүнтэй холбогдуулан “БНСУ-ын хэвлэл мэдээллийн хэрэгсэл болон цахим сайтуудаар Монгол Улсыг хууль, ёсзүйгүй орон мэтээр олон улсад ойлгуулж, доромжилсон. Мөн уг хэргийн улмаас тус улсад ажиллаж, амьдардаг монгол иргэдийг ичгэвтэр байдалд оруулаад зогсохгүй ажил амьдралд нь бодитой хохирол учруулах болсон талаарх захидлыг Солонгос улс дахь монгол эмэгтэйчүүдийн нэгдсэн холбооноос ирүүлсэн.

Нөгөөтэйгүүр, манай улсад ажлын байрны болон бусад бэлгийн дарамтыг зохистой шийдвэрлэж, хохирогчдыг хамгаалж чадаагүйд бухимдалтай байна. Хэрэв энэ үлй явдал манай улсад үйлдэгдсэн бол хохирогчийг буруутгаж, эрх мэдэлтэй өндөр албан тушаалтныг хаацайлаад гарах эрх зүйн орчин хэвээр байгаад харамсаж байна.  

Тиймээс Д.Одбаяр өөрийн хүсэлтээр албан үүргээсээ чөлөөлөгдөж, Солонгос улсад ажиллаж амьдарч байгаа иргэдээс албан ёсоор уучлал гуйх, бэлгийн дарамтлагчдад эрүү болон зөрчлийн хуулиар хууль зүй ба ёсзүйн хариуцлага тооцдог болохыг шаардаж байна. 

Учир нь төрийн өндөр албан тушаалтнууд хариуцлагаас мултардаг, хуулийг ялгаварлаж хэрэгжүүлдэг, хүний эрхийн зөрчлүүдийг хуулиар хамгаалдаггүй байдлыг таслан зогсоохыг хүсч иргэдийг нэгдэхийг уриалж байна” гэлээ.

Б.Лхам