Язгуурын гурван бурхдын хувилгаан, хоёрдугаар ялгуусан Богд Зонховын нирваан дүр үзүүлсний 600 жилийн ойг дэлхий нийтээр тэмдэглэн өнгөрүүлж байна. Үүнтэй холбогдуулан Гандантэгчэнлин хийдээс мэдээлэл хийлээ. Энэ талаар ту хийдийн Олон нийттэй харилцах албаны дарга Ж.Одгарьд "Дээрх арга хэмжээний хүрээнд Гандантэгчэнлин хийд, Эрдэм соёлын хүрээлэн, хүрээ хийдүүд, Тэргүүн лам нарын зөвлөл хамтран Богд Зонховын 600 жилийн ойг тэмдэглэн өнгөрүүлэх ёслолын ажиллагааг энэ сарын 7, 8-ны өдрүүдэд зохион байгуулахаар төлөвлөсөн. Тухайлбал, арванхоёрдугаар сарын 7-нд Тэргүүн их Хамба лам нийт монголчуудад Аврал од болохын хөтөлбөр, Бурхны шашинтай хүн байх болон Богд ламын намтрыг бүтэн өдрийн турш тайлбарлан таниулж, Мэгзэмийн лүн хүртээх бол 17.00 цагаас эхлэн Гандантэгчэнлин хийдэд цугласан лам, хуврагууд бүхэл шөнөжин ном хурна. Харин арванхоёрдугаар сарын 8-ний өдрийн 09.00 цагт Батцагаан дуганд оюутан залуусын дунд зарласан "Бурханы шашин ба монголчууд" сэдэвт эссэ бичлэгийн уралдааны шагналыг гардуулахаас гадна Богд Зонховын нандин өв соёлын зүйлүүдийг дэлгэж, олон нийтэд үзүүлнэ" гэлээ. 

Г.Алимаа