УИХ-ын чуулганы хуралдаанаар Засгийн газраас өргөн мэдүүлсэн Өргөн нэвтрүүлгийн тухай хуулийн төслийн анхны хэлэлцүүлгийг хийж, гишүүдийн олонхийн саналаар дэмжлээ. Үүнтэй холбоотой асуудлаар ХЗДХ-ийн сайд Ц.Нямдоржоос дараах зүйлийг тодрууллаа.

-Өргөн нэвтрүүлгийн тухай хуулийн төслийн анхны хэлэлцүүлгийг хийлээ. Та дэмжих үү?

-Дэмжинэ.

-IP телевизүүдийн орлогоос тодорхой хэмжээгээр телевизүүдэд хуваарилах асуудал яригдаж байна. Хуулийн зарчмыг та юу гэж харж байна вэ?

-Ямар нэг хэмжээгээр орлогоо хуваах ёстой. МҮОНРТВ нь хуультай бусад телевизүүд нь хуульгүй шахам явж байна.  Уг нь телевизийн хөтөлбөрийн цаана зохиогчийн эрхийн асуудал яригдах ёстой. Гаднын орнын уран бүтээлчид баян тансаг амьдардаг. Гэтэл манай улс одоог хүртэл уран бүтээл тэр дундаа сэтгүүлчдийн орлогын эх үүсвэр жишээ нь нэвтрүүлэг хийлээ гэхэд түүний эх үүсвэрийг тасралтгүй үргэлжлүүлэх хуулийн орчин байхгүй байна. Энэ утгаараа энэ хуулийг би дэмжинэ.

-Хуулийн зарчмын зөрүүтэй зарим байр суурийг нэгтгэлээ. Өөр ямар онцлог заалт нэмэгдэж байна вэ?

-Хууль ямар хэлбэртэй байхыг хэлэлцүүлгийн шатанд шийдэх байх. Хоёрдугаарт, сэтгүүлчдийн зүгээс цаашид эх орноо бодсон нь дээр. Тухайлбал, эх орны ирээдүй хаашаа яваад байна, гурван сая иргэн их гүрнүүдийн дунд яаж амьдрах зэрэг тал тал руу нь харж сэтгүүлчийнхээ үйл ажиллагааг явуулах хэрэгтэй. Дээрх хууль батлагдсанаар хэвлэл мэдээллийнхэнд энэ боломжийг нь олгох байх.

Б.Лхам