НОБГ, НМХГ-аас сайжруулсан шахмал түлшний хэрэглээний талаар мэдээлэл хийлээ.

НМХГ-ын дэд дарга С.Даваасүрэн “Өнгөрсөн шөнийн байдлаар угаарын хийнд хордсон хоёр дуудлага ирсэн. Угаарын хийнд хордсон дуудлагын тоо багасч байна. Сүүлийн үед нийслэлд агаарын бохирдол өмнөх байдлаас нэмэгдэж байна. Үүнтэй холбогдуулан НМХГ-аас түүхий нүүрс хэрэглэх зөвшөөрөл авсан ААН-үүдэд хяналт, шалгалт хийх гэж байна. Учир нь түүхий нүүрс түлэх зөвшөөрөлтэй ААН-үүд яндандаа шүүлтүүр хийх ёстой. Зарим мэдээллийн дагуу хяналт, шалгалт хийхэд шүүлтүүрийг ажиллуулахад тог их гарч байна гэх шалтгаанаар унтраасан мөн зарим шүүлтүүр нь шаардлага хангахгүй асуудал гарч байна. Тиймээс энэ талаарх хяналт, шалгалтыг эрчимжүүлнэ. Тавьж буй шаардлагагыг зөрчсөн ААН-ийг гурав хүртэлх сая төгрөгөөр торгох зохицуулалттай байдаг. Удаа дараа ААН-үүдэд шаардлага тавихад шалтаг, шалтгаан тоочиж байна. Тиймээс тодорхой хугацааны шаардлага өгнө. Өгөгдсөн хугацааны дагуу шаардлагыг биелүүлээгүй тохиолдолд торгох, олгогдсон зөвшөөрлийг цуцлах зэрэг арга хэмжээ авна. Үйл ажиллагааг нь зогсооё гэхээр сургууль, цэцэрлэг, албан байгууллагуудын инженерийн дэд бүтэц хөлдөх учраас хугацаатай шаардлага хүргүүлж ажиллана” гэлээ.

Мөн энэ сарын 2-8-ны хугацаан дахь агаарын чанарыг өнгөрсөн оны мөн үетэй харьцуулахад азтоын давхар исэл 30 хүртэлх хувиар өсч, PM10 тоосонцор 20 хувиар, PM2.5 хэмжээтэй тоосонцор 15 хувиар буурчээ. 

Б.Лхам