УИХ дахь МАН-ын бүлгийн хурлаар ирэх оны төсвийн тухай хууль, Нийгмийн даатгалын шимтгэлийн төсвийн тухай хууль, Эрүүл мэндийн даатгалын сангийн ирэх оны төсвийн тухай хуулиудад Ерөнхийлөгчийн тавьсан хориг болон бусад асуудлаар хэлэлцжээ.

Энэ талаар МАН-ын бүлгийн дарга Д.Тогтохсүрэн “2020 оны Төсвийн тухай хуульд Ерөнхийлөгч хоёр асуудлаар хориг тавьсан. Тухайлбал, 2020 онд объект нь эхлээд 2021, 2022 дамжих хэрэгжих объектийг улсын төсвөөс хасах санал юм. Үүнтэй холбогдуулан хоёр санал ирүүлсэн. Бүлэг хэлэлцээд 2020 онд улсын төсөвт тавьсан Ерөнхийлөгчийн хоригийг хүлээн авах боломжгүй гэж үзлээ. Мөн Ирээдүй өв сангийн тухай хуулийн төслийн нэмэлт, өөрчлөлтөд бүхэлд нь хориг тавьсан. Уг хоригийг ч мөн хүлээн авахгүй боломжгүй. Гуравдугаарт, НДС-ийн тухай хуульд тавьсан хоригийг МАН-ын бүлгийн ихэнх нь хүлээн авах нь зүйтэй гэж үзлээ.

Түүчнлэн Ерөнхийлөгч Өмгөөллийн тухай хуульд хориг тавьсан. Уг хоригийг бүлэг хэлэлцээд хүлээн авахгүй байхаар шийдвэрлэлээ” гэлээ.

УИХ-ын гишүүн Х.Нямбаатар “Ерөнхийлөгч энэ сарын 3-нд Өмгөөллийн тухай хууль болон түүнийг дагалдан батлагдсан хуулиудад хориг тавьсан. Хоригт давхардсан чиг үүрэгтэй, ижил төрлийн холбоод байх нь зохимжгүй юм. Тиймээс хуульчдын холбоонд өмгөөлөгчид харьяалагдаад явахад буруу зүйл байхгүй.

Хоёрдугаарт, Хуульчдын холбоо зургаан жилийн турш үр дүнтэй ажилласан. Өмгөөллийн үйл ажиллагаа эрхлэх эрх үүсч байгаа хуульчдын болзол шалгуур, шалгалт авах үйл ажиллагааг Өмгөөллийн тухай хуулиар зохицуулах боломжгүй. Хуульчдын холбооны зарим асуудлыг хуулиар зохицуулж, Өмгөөллийн холбоонд шилжүүлсэн нь холбогдох хууль тогтоомжийг зөрчиж байна гэсэн. Харин Өмгөөлөгчдийн холбооноос Ерөнхийлөгчийн хоригтой холбогдуулан бүлгийн дарга Д.Тогтохсүрэнд дараах утга бүхий албан бичиг хүргүүлсэн юм.

Тухайлбал, Монгол Улсын шинэ үзэл баримтлал эрх мэдлийг хуваарилах, тэр дундаа шүүх эрх мэдлийг гагцхүү шүүх хэрэгжүүлнэ. Шүүх эрх мэдлийн үйл ажиллагаанд оролцдог байгууллагууд өөрсдийн чиг үүргийн дагуу оролцож, харилцан бие биеэсээ хараат бус байх ёстой. Гэвч шүүгч, прокурор, өмгөөлөгчтэй холбоотой харилцааг нэг харилцаагаар зохицуулж байгаа явдал нь эрх мэдэл хуваарилах, хараат бус бие даасан байдалтай зөрчилдөж байна гэсэн албан бичиг ирүүлсэн. Тиймээс Өмгөөллийн тухай хуульд тавьсан Ерөнхийлөгчийн хоригийг хүлээн авахгүй байхаар шийдвэрлэлээ” гэв.

Б.Лхам