УИХ дахь ШИНЭ намын гишүүд өнгөрөгч амралын өдрөөр Өмнөговь аймагт ажиллах үеэрээ “Бид өмнийн говьчуудын амьдралыг дээшлүүлэхээр, Өмнөговийг уул уурхайн олигархуудаас чөлөөлөхөөр ирлээ” хэмээгээд тус бүс нутагт тулгамдаад буй уул уурхайн асуудалд голчлон анхаарч үзэхээ амласан. Тэгвэл тус нам өнөөдөр ээлжит хуралдаанаа нээлттэй хийж, Сонгуулийн тухай хууль, Дубайн гэрээ, Авто зам ашигласны төлбөр зэрэг асуудлыг хэлэлцлээ. Хуралдааны дараа сэтгүүлчдэд мэдээлэл өгөв. УИХ-ын гишүүн, ШИНЭ намын дарга Ж.Батзандан “УИХ-аас байгуулсан Сонгуулийн тухай хуулийн төслийн Ажлын хэсэгт ШИНЭ намын Төв зөвлөлийн дарга Л.Болд орсон. Үүнээс гадна ШИНЭ намын Зөвлөлийн дэргэд Сонгуулийн тухай хуулийн төсөл дээр санал, дүгнэлт боловсруулах Ажлын хэсэг байгууллаа. Энэ ажлын хэсгийг эдийн засагч Ц.Баттуяа ахалж байна. Ажлын хэсгийн санал, дүгнэлтийг УИХ-ын ажлын хэсэгт өгсөн. Сонгуулийн хуулийн төсөлд сонгогчдын эрхийг зөрчсөн 10 гаруй заалт байна. Иймд хуулийн төслийг чамбайруулж, сайжруулахгүй бол сонгуулийн луйвар болж, сонгогчдын эрх ашиг зөрчигдөнө гэж ШИНЭ намын зөвлөл үзэж байна. Зөвлөлийн хурлаар сонгуулийн хуулийн хэлэлцүүлэгтэй холбогдуулан парламентын гадна байгаа улс төрийн намуудын удирдлагуудыг урьсан. БНН-ын дарга Д.Жаргалсайхан хүрэлцэн ирж, байр сууриа илэрхийллээ.

Оюутолгойн гэрээний асуудлаар УИХ-ын тогтоолын төслийг боловсруулах үүрэг бүхий Ажлын хэсэг байгуулагдсан. Үүнтэй холбогдуулан ШИНЭ намын зөвлөл дэргэдээ Ажлын хэсэг байгууллаа.

Өнөөдөр гадаа иргэд автозам ашигласны төлбөрийг тав дахин нэмэгдүүлснийг эсэргүүцэж, жагсаж байна.

Эрх баригч нам 2016 оны сонгуульд орходоо нэг ч татвар нэмэхгүй гэж амласан ч ялалт байгуулснаасаа хойш амлалтыхаа эсрэг ажиллаж байгааг ШИНЭ нам  буруушааж байна. Манай нам энэ асуудлаар жагсагчидтай уулзана.

Өнгөрөгч амралтын өдрүүдэд ШИНЭ нам говийн аймгуудад ажиллаж, иргэдийнхээ санаа бодлыг сонслоо. Өмнөговийн иргэдийн тавьж буй гол асуудал нь Цагаандэлийн боомтыг нээхийг эсэргүүцэж байна. Нутгийн иргэдийн саналыг асуулгүй шийдвэр гаргаж байгаад маш их бухимдалтай байна. ШИНЭ нам Өмнөговь аймагт боомт нэмж, бэлчээр талхиж, тоосжилт нэмэгдүүлж, хүн, малын эрүүл, аюулгүй орчинд амьдрах эрхийг улам боогдуулах шийдвэрийг эсэргүүцэж байна.

Мөн Дорноговь, Дундговь, Говьсүмбэр аймагт ажиллах үед иргэдээс ирсэн санал хүсэлтүүдийг нэгтгэж, ирэх долоо хоногийн зөвлөлийн хурлаар хэлэцэнэ гэлээ.

УИХ-ын гишүүн, ШИНЭ намын Төв зөвлөлийн дарга Л.Болд “Энэ долоо хоногийн хэлэлцэх асуудал дотор Ерөнхийлөгчийн сонгуулийн тухай хууль. ШИНЭ намын зөвлөл уг хуулийн төслийг яаравчлан хэлэлцэх нь буруу, хойшлуулах хэрэгтэй гэдэг шийдвэр гаргасан. Мөн энэ долоо хоногт Ерөнхийлөгчийн тавьсан хоёр ч хоригийг хэлэлцэхээр төлөвлөсөн. Эхнийх нь Нийгмийн даатгалын шимтгэлийг нэмэгдүүлэхтэй холбоотой хориг. ШИНЭ намын зүгээс энэ хуульд нэмэлт, өөрчлөлт оруулах хуулийн төсөл санаачилсан ч нэгэнт Ерөнхийлөгч хориг тавьсан байгаа тул уг хоригийг дэмжиж энэ асуудлыг шийдвэрлэх бололцоотой гэж үзэж байна. Эдийн засаг хүндрэлтэй энэ үед ард түмний нуруун дээр нэмж ачаа зүрүүлэх нь буруу гэж ШИНЭ намын зөвлөл үзсэн. Дараагийнх нь Өмгөөллийн тухай хууль дээр тавьсан хориг. Өнгөрөгч лхагва гарагт байнгын хороогоор энэ асуудлыг хэлэлцсэн. Энэ хоригтой холбогдуулан ШИНЭ намын зөвлөлийн дэргэд хуульчдын ажлын хэсэг байгуулсан. Ажлын хэсгийн санал, дүгнэлт гарсны дараа ШИНЭ намын зөвлөл байр сууриа илэрхийлнэ” гэв.

Г.Эрдэнэ