Авто замын тухай хуулийн  заалтыг үндэслэн 2015 оноос авто зам ашигласны төлбөр авч эхэлсэн байдаг. Энэ хүрээнд нийслэлд бүртгэлтэй тээврийн хэрэгсэл хөдөлгүүрийн багтаамжаасаа хамаарч авто зам ашигласны төлбөрт 10-60 мянган төгрөг төлдөг. Харин 2020 оны нэгдүгээр сарын 1-нээс авто зам ашигласны төлбөрийг тав дахин нэмэгдүүлж,  50-120 мянга хүртэл төгрөг төлөхөөр батлаад байгаа юм. Саналыг нийслэлийн Засаг дарга С.Амарсайханы оруулсан бөгөөд Нийслэлийн Иргэдийн төлөөлөгчдийн 29 дүгээр хуралдаанаар хэлэлцэн баталсан билээ.

Үүнтэй холбогдуулж иргэдийн зүгээс нэлээд шүүмжлэлийг дагуулаад байгаа юм. Тэгвэл энэ асуудлаар Ерөнхий сайд У.Хүрэлсүх нийслэлийн Засаг дарга С.Амарсайханыг өнөөдөр дуудаж уулзсан бололтой. Тэрбээр олон нийтийн эрх ашгийг хөндсөн ямар нэг асуудлаар шийдвэр гаргуулахдаа иргэдийн санал бодлыг сонсож, бодлого, үйл ажиллагаандаа тусгаж байх нь зүйтэй гэдгийг хэлжээ. Тухайлбал, автозам ашигласны хураамжийг нэмсэнтэй холбогдуулан энэ талаар НИТХ-д дахин асуудал оруулж хэлэлцүүлэхийг чиглэл болгосон байна.

Энэ дагуу тооцоо, судалгаагаа дахин нягталж, хуулийн хугацаанд нь НИТХ-д хандана гэдгээ Нийслэлийн Засаг дарга бөгөөд Улаанбаатар хотын захирагч С.Амарсайхан хэлжээ. Гэвч нийслэлийн удирдлагуудын зүгээс гаргасан шийдвэрийг эсэргүүцсэн иргэд хоёр дахь өдрөө жагсаал хийж, эсэргүүцлээ илэрхийлж байна.

С.Сүлд