УИХ-ын Өргөдлийн байнгын хорооны хуралдаанаар “Эрдэнэс Тавантолгой” хувьцаат компанийн 1072 хувьцааг эзэмшигчдэд ногдол ашиг хуваарилах асуудлаар мэдээлэл сонссон юм. Мэдээллийг Уул уурхай, хүнд үйлдвэрийн сайд Д.Сумъяабазар өгөхөөр байсан ч тодорхой шалтгааны улмаас ирсэнгүй. Тиймээс "Эрдэнэс Тавантолгой" компанийн гүйцэтгэх захирал Б.Ганхуяг мэдээлэл өгч гишүүдийн асуултад хариуллаа.

Түүний хийсэн мэдээлэлтэй холбогдуулж, УИХ-ын гишүүн Ц.Гарамжав “Тавантолгойн 85 хувийн хувьцааг төр эзэмшиж байна. 15.1 хувь нь л ард түмэнд тараагдана. 2017 оноос ашигтай ажиллаж эхэлсэн. Энэ онд 1.1 их наядын ашигтай ажилласан байна. Энэ татварын дараах ашиг. Ард түмний эзэмшилд байгаа хувьд ногдол ашгийг олгох ёстой. Тэдний зөвшөөрөлгүй ногдол ашгийг үрэх эрх хаана ч байхгүй. Нэгж хувьцаа дор хаяж 50 төгрөг баймаар юм шиг байгаа. Гэтэл 25 төгрөг гээд байгаа. Тавантолгой компанийн төлөөлөлд хувьцаа эзэмшигчдийн эрх ашгийг хангах төлөөлөл байна уу” гэсэн асуултыг тавьсан юм.

Хариуд нь “2018 оны 807 тэрбум төгрөгөөс нэгж хувьцааг 25 төгрөг гэж манай ТУЗ-өөс шийдсэн байсан. Энэ нь төрд 244.5, иргэд аж ахуйн нэгжид 55.4, хөрөнгө оруулалт болон бусад зардлаа хасч тооцсон. Ногдол ашиг хуваарилах боломжтой зардал нь 300 тэрбум төгрөг. Үлдэгдэл нь компанийн хөрөнгө оруулалтад зарцуулах шийдвэр гаргасан. Дараа нь тодорхой төслийн хөрөнгө оруулалтыг санхүүжүүлэх шийдвэр гарсан учраас ТУЗ дахин хуралдаж өмнөх шийдвэрээ өөрчилсөн. Ерөнхий сайдаас иргэдийн хувьцаанд хуваарилах 55.4 тэрбум төгрөгийг хөрөнгө оруулалтад зарцуулсан ч эргээд тодорхой хугацааны дараа чиглэл өгсөн. Манай компани ТУЗ-ийн 11 гишүүнтэй. Дөрөв нь хараат бус гишүүн” гэдгийг компанийн захирал Б.Ганхуяг хэлэв.

Мөн тэрбээр “Компанийн үйл ажиллагаа 2016 оноос идэвхжиж эхэлсэн. Үүнээс өмнө 1072 ширхэг хувьцаа улс төрийн хэрэгсэл болчихсон байсан. Бид өнөөдрийг хүртэл улс төрийн болон эдийн засгийн хүндрэл бүтээгдэхүүний үнийн уналт гээд бүх зовлон жаргалын ард гарсан. Энэ хугацаанд 2 сая гаруй иргэний 1.6 саяыг бүртгүүлээгүй байсан. Бүртгэл идэвхтэй явсан. Компанийн орлого ашигтай холбоотойгоор бүртгэл сэргэж байна. Үлдсэн 700 гаруй мянган иргэний тал хувь нь хүүхдүүд. Дээрээс нь гадаадад оршин суугаа иргэд байгаа. 2018 онд хуваарилсан 55.4 тэрбум төгрөг төмөр замд зарцуулагдсан байгаа. 2018 оны ашгийг нөхөж олгох боломжгүй” гэсэн юм.

Харин УИХ-ын гишүүн Г.Солтан “Жилд 30 сая тонн нүүрс экспортолно гэсэн. Үүнийг ТҮЦ-нээс тамхи зарж байгаа юм шиг зардгаа болих хэрэгтэй. Ингэсэн тохиолдолд компани ашигтай ажиллахгүй. Ногдол ашгаа өгөх хэрэгтэй” гэлээ. 

С.Сүлд