Агаарын бохирдол сүүлийн хэд хоног огцом ихэслээ. Үүнд мөн л иргэд хоёр хуваагдаад амжиж. Тухайлбал, шахмал түлшинд анхнаасаа тааламжгүй байсан иргэд “Утаа арилаагүй шүү” хэмээн цахим сүлжээнд нийтэлж, сануулж буй бол зарим нь иргэд түүхий нүүрс их түлж байгаатай холбогдуулан тайлбарлаж байна.

Нийслэлд түүхий нүүрс түлэх зөвшөөрөлтэй 500 гаруй аж ахуйн нэгж бий. Тэд түүхий нүүрс хэрэглэхдээ яндандаа утаа шүүгч хэрэглэх ёстой ч цахилгаан их гарч байна гэж унтраасан, ажилладаггүй төхөөрөмж тавьсан зэрэг асуудал гарч байна. Үүний хажуугаар иргэд түүхий нүүрс түлэх явдал гарч байгаа нь үнэрээсээ анзаарагдаж буй юм.

Учир нь сайжруулсан түлшний хэрэгцээ хангамж муу байна. Тухайлбал, байшин халаадаг иргэд өдөрт шуудай гаруй нүүрсээр гэрээ халаадаг гэнэ. Гэтэл нэг айл өрх долоо хоногт зургаан түлшээр хэрэглээгээ хангах цензур тогтоогоод байгаа юм. Тиймээс зургаан шахмал түлшээ долоо хоногтоо хүргэж чадаагүй айл өрх нөөшилсөн түүхий нүүрсээсээ үлдсэн хоногийнхоо хэрэглээг хангаж байж магадгүй байна.

Тухайлбал, Баянзүрх дүүргийн есдүгээр хорооны цэгүүдэд түлшний хомсдол үүсч, сайжруулсан түлшинд дугаарласан машин уртаас урт эгнээ үүсгэн зогсжээ. Тухайн цэгт шуудайлсан бэлэн түлш байгаагүйгээс үүдэн ийн дугаар үүсгэсэн хэрэг. Хоёр ажилчин дугаарлан зогссон иргэдийг түлштэй буцаахын тулд хүйтнийг ч ажралгүй зогсоо зайгүй ажиллаж харагдана. Шигшинэ. Дараа нь уутална.

Иргэдийн галлагаа ид хийдэг үе нь оройн цаг. Яг л энэ үед ажлаасаа буусан иргэд түлшээ зэхэж, гэрээ халаах гэж яарч буй нь мэдээж. Машины жолоочид машинаа эгнүүлчхээд дугаараа алдчих вий гэсэн шиг “тэдний машинд хоёр орчихлоо, одоо минийх шүү” хэмээн зогсоно. Зарим нь “түлшээ яагаад урьдчилан шуудайлаагүй юм. асгарчихвал яах вэ” гэнэ. Зарим нь “манайх нярай хүүхэдтэй. Өдөржин галаа барих шаардлагатай болно. Гэтэл долоо хоногт өгч байгаа зургаан түлш байшин халааж хаанаа ч хүрэлцэхгүй юм. Яавал дээр вэ” гэх мэт яриагаар борлуулагчийг булна.

Гэвч даарч чичигнэсэн худалдагчид бушуухан л түлшийг нь өгөөд дулаацъя гэж бодож байгаа нь илт. Тэрбээр “Түлшийн гадна уутан дээр дугаар байгаа шүү. Тэр утас руу залган санал хүсэлтээ хэлээрэй” гээд л дараагийн хүнд үйлчлэхээр карт уншуулна.

Баянзүрх дүүргийн есдүгээр хороонд сайжруулсан түлшний хоёр орчим цэг байна. Да хүрээний буудал буюу тэднийхний хэлж заншсанаар хоёрын буудлын цэгт түлшний хүрэлцээ муу байгаатай холбогдуулан нэг картаар хамгийн дээд талдаа зургаан түлш өгдөг байсан бол хоёр түлш л өгч байна.

Мөн түлшний хүртээмжээс шалтгаалан зарим газар түүхий нүүрс нууцаар борлуулж буй иргэд бий болсон аж. Тиймээс нэг талаар түлшний хүртээмжээс шалтгаалан иргэд түүхий нүүрс хэрэглэхээс өөр аргагүйд хүрч байж магадгүй байна.

Б.Лхам