Авлига, албан тушаалтанд холбогдох гэмт хэргийн хөөн хэлэлцэх хугацааг 2015 онд баталсан Эрүүгийн хуулиар өөрчилснөөс болж гэмт хэрэгтнүүд ял завшиж буйд иргэд шүүмжлэлтэй хандаж буй. Тэгвэл УИХ-ын гишүүн Б.Пүрэвдорж тус хууль хэрэгжиж эхэлснээс хойш хэчнээн гэмт хэрэг хэрэгсэхгүй болж, хэдэн албан тушаалтан ял завшсан талаар чуулганы хуралдааны үеэр мэдээллээ. Тухайлбал тэрбээр "Эрүүгийн хуульд 2015 онд өөрчлөлт оруулж, 2017 оны долдугаар сарын 1-нээс хэрэгжиж эхэлсэн. Үүнээс хойш буюу 2019 оны аравдугаар сарын 20-ны байдлаар нийтдээ 629 гэмт хэрэг хэрэгсэхгүй болсон. Үүний үр дүнд 1200 гэмт хэрэгтэн ял авагүй. Авлига, албан тушаалтны 42 гэмт хэрэг хэрэгсэхгүй болсон. Үүний дунд оймсны гэх хэрэг багтана. Оймсноос нь 25 сая төгрөг, гэр, албан тасалгаанаас нь нэг тэрбум төгрөг илэрсэн. Хахуулийн мөнгө. Гэтэл ял авалгүйгээр эрх чөлөөтэй алхаж байна. 629 гэдэг тоог шүүх, прокурорын байгууллагаас авсан. Үүнээс хойш дахиад 47 гэмт хэрэг хэрэгсэхгүй болсон. Энэ бол прокуророос өгсөн тоо. Шүүхээс дахиад хэдэн хэрэг хэрэгсэхгүй болгож байгааг мэдэхгүй. Хууль нь ийм юм чинь өөр яалтай билээ. Тун удахгүй авлигын 11 гэмт хэрэг хэрэгсэхгүй болно.

Үүний дунд Жастын Ш.Батхүүгийн хэрэг багтана. Хохирол нь 143 тэрбум төгрөг.

Хөөн хэлэлцэх хугацааны улмаас хэрэгсэхгүй болсон хэргүүдийн нийт хохирол хоёр их наяд төгрөг. Өнөөдөр хөөн хэлэлцэх хугацааг засаж байна гэж байгаа боловч энэ төрлийн гэмт хэргийг илрүүлэхэд цаг их ордог. Мөрдөн шалгаж байх хоооронд хөөн хэлэлцэх хугацаа дуусах эрсдэлтэй. Угаасаа ч тэгж байна. Өдөрт 1-2 гэмт хэрэг хэрэгсэхгүй болж байна. Хөөн хэлэлцэх хугацааг өөрчлөнө гэлээ. Тэгсэн ч ялгаагүй. Х.Нямбаатар тэргүүтэй гишүүд хөөн хэлэлцэх хугацаа дууссан гэмт хэргийг дахиж сэргээнэ гэсэн. Ингэх боломжгүй. Тэд өөрсдөө сайн мэднэ. Хуулиар эрх зүйн дээрдүүлсэн нөхцөлийг хэрэглэдэг. Ингэхээр ямар ч ялгаагүй" гэлээ.

Г.Эрдэнэ