Засгийн газраас тэтгэврийн зээлийг нэг удаа тэглэх хуулийн төслийг боловсруулж, УИХ-д өргөн бариад байгаа билээ. Уг асуудлаар УИХ дахь МАН-ын бүлэг болон АН-ын зөвлөл хуралдаж, дэмжсэн шийдвэрт хүрээд байгаа юм. Энэ талаар Сангийн сайд Ч.Хүрэлбаатараас зарим асуултад хариулт авлаа.

-Тэтгэврийн зээлийг нэг удаа тэглэх асуудалд Та ямар байр суурьтай байгаа вэ. Саяхан Засгийн газраас хуулийн төсөл боловсруулж УИХ-д өргөн бариад байгаа?

-Монголбанкны ерөнхийлөгч энэ асуудлаар тодорхой төсөл боловсруулаад ҮАБЗ-д танилцуулсан. Энэ дагуу ҮАБЗ-өөс зөвлөмж гаргаж, улмаар Засгийн газар шийдвэрээ гаргасан. Төрийн болон арилжааны банкнаас авсан зээл, банк хооронд үүссэн харилцааг Монголбанк болон банкны системийнхэн тодорхой шийдэл гаргаж шийдье гэсэн санал орж ирсэн. Засгийн газраар хэлэлцээд Салхитын мөнгөний ордыг эдийн засгийн эргэлтэд оруулах замаар шийдэх боломжтой юм байна гэж ойлгосон. Нэгэнт улс төрийн шийдвэр гарчихлаа. Засгийн газар кабинетын зарчмаар ажилладаг. Би байр сууриа илэрхийлсэн.

-Хуулийн төслийн хүрээнд зургаан хувийн хүүтэй, таван жилийн хугацаатай хаалттай бонд гаргана гэсэн?

-Засгийн газар бонд гаргахгүй. Нээлттэй бондыг хөрөнгийн зах зээлд арилжаалаад явж болдог. Харин хаалттай бонд зарагдахгүй гэсэн үг.

-Засгийн газар бонд гаргахгүй гэхээр энэ асуудлыг яаж шийднэ гэсэн үг вэ?

-Салхитын мөнгөний ордтой холбоотой компанийн бонд гарах байх.

-Бондыг эргэн төлөх хөрөнгө нь улсын төсвөөс гарах уу?

-Улсын төсөв үүнд хамаарахгүй.

-Засгийн газрын шийдвэрт ОУВС ямар байр суурьтай байгаа бол?

-ОУВС-гийн төлөөлөгчид удахгүй Монголд ирнэ. Гэхдээ дэмжинэ гэж бодохгүй байна.

С.Сүлд