УИХ дахь МАН-ын бүлэг өнөөдөр ээлжит бусаар хуралдаж хэд хэдэн асуудлаар байр сууриа нэгтгээд байгаа юм. Бүлгийн хуралдаанаар ямар асуудлыг хэлэлцсэн талаар тус намын ерөнхий нарийн бичгийн дарга Д.Амарбаясгалан сэтгүүлчдэд тайлбар өгсөн юм.
Тэрбээр "МАН 2020 оны парламентын сонгуульд нэр дэвших хүмүүсээс ямар нэг байдлаар мөнгө авахгүй. Өмнө нь улс төрийн намууд тодорхой хэмжээнд мөнгөний босго тавьж, түүнийг нь хандивласан хүн нэр дэвших эрхээ олж авдаг байсан. Харин МАН энэ удаа тийм байдлаар ажиллахгүй гэдгээ зарлалаа. Сонгуулийн тойрогт нэр дэвшихийг хүссэн хүмүүс МАН-аас явуулах зохион байгуулалтын буюу суурь судалгааны ажлыг дэмжиж, өөрт оногдох зардлыг л гаргаж оролцоно гэсэн үг.
Сонгуульд нэр дэвших хүмүүсээс хөрөнгө авахгүй болсноор улс төрийн намын санхүүжилтийг илүү ил тод байх зарчим руу орж байна.
Бүлгийн хуралдааны үеэр намын даргын ярьсан зарчмын асуудал нь нэр дэвших гэж буй хүмүүс ямар нэг байдлаар хууль зөрчсөн хандив дэмжлэгийг иргэд болон ААН-үүдээс авч болохгүй. Авсан этгээдийг 2020 оны сонгуульд нэр дэвшүүлэхгүй гэдгийг хэлсэн.
Нам сонгуульд ялсан тохиолдолд хандив өгсөн хэмжээгээр нь албанд томилох асуудлыг таслан зогсоох ёстой. МАН ах дүү, найз нөхдийн хүрээллээр албан тушаалд томилдог байдлаас татгалзаж, илүү хариуцлагатай, ёс зүйтэй ажиллаж чадах хүмүүсээ төрд төлөөлөл болгон ажиллуулах чиглэлийг барихаа албан ёсоор хэлж байна.
Ингэснээр 2020 оны сонгуулийн дараа шинээр байгуулагдах парламент, Засгийн газар, төрийн албанд өмнө нь гарч байсан алдаа дутагдал давтагдахгүй байх боломж бүрдэж байгаа хэрэг. Бид өнөөдөр тойргуудад нэр дэвших хүсэлтээ илэрхийлсэн хүмүүсийг суурь судалгааг хийж эхлүүлсэн.
Судалгаагаар иргэд хэнийг нь илүү дэмжиж байгаа эсэх, одоогийн гишүүдээ ажиллуулах хүсэл сонирхол байгаа эсэх болон шинээр дэвших хүмүүстээ ямар шаардлага тавьж буй гэдэгт илүү төвлөрч ажиллана. Намын санхүүжилтийн асуудалд ил тод байдлыг чухалчилна. Хуульд заасан хэм хэмжээний хүрээнд хандиваа төвлөрүүлж, төвлөрсөн хандивын хэмжээгээр сонгуулийн кампинат ажлыг зохион байгуулна. Судалгааны дүн гуравдугаар сарын сүүлээр гарах бөгөөд хэн нэр дэвших эсэх асуудал урьдчилсан байдлаар ярьж эхэлнэ.
Сонгуулийг томсгосон тойрог болгон өөрчилсөн шалтгаан нь мөнгөний сонгуулиас ангид байхыг зорьсон. Энэ нь сонгуулийг аймаг орон нутгийн намын байгууллагын түвшинд нэгдсэн байдлаар зохион байгуулах боломжийг нээж өгсөн. Нэг аймагт нэр дэвших гурван хүн мөнгөө нийлүүлээд аймгийн намын штабын удирдлагад ажиллах боломжийг нээж өгч байгаа юм. Ингэснээр төсөв гурав дахин хэмнэгдэнэ.
Сонгуулийн хуульд газар нутгийн байршил, хүн амын нягтаршил, засаг захиргааны нэгжийн хуваарилалт гэсэн хэд хэдэн зүйлийг үндэслэж мандатын хуваарилалтыг хийнэ заасан. Говь-Алтай, Дундговь, Булган, Сүхбаатар аймгийг хоёр мандаттай байлгах нь зөв гэж үзэж байна" гэлээ.
С.Сүлд
Сэтгэгдэл (7)