Монголын улс төрд өөрийн гэсэн өнгө төрхөө "шударга гишүүд" хэмээх тодорхойлолтоор бий болгоод буй УИХ-ын гишүүн Ж.Батзандан болон Л.Болд нарын ШИНЭ намаас "санаачилсан" нэгэн цуглаан Сүхбаатарын талбайд болж байна. ШИНЭ намын зүгээс ахмадуудыг ялгаварлахгүй байхыг, зээлтэй, зээлгүй бүх иргэдэд адил тэгш хэмжээний мөнгө "тараах" ёстой гэсэн байр суурь илэрхийлээд байгаа. Тэгвэл Сүхбаатарын талбайд ШИНЭ нам болон Манан дэглэмийн эсрэг Монгол түмний нэгдэл, тэтгэврийн бага зээлтэй болон зээл аваагүй ахмадууд жагсаал зохион байгуулж байна. Жагсаалын үеэр хөдөлгөөнд оролцож байгаа ахмадууд тэтгэврийн зээлийг нэг удаа тэглэх ҮАБЗ-ийн шийдвэрийг зөвшөөрөхгүй байгаагаа илэрхийлсэн юм. 

Хөдөлгөөний зүгээс "ҮАБЗ-ийн шийдвэр нийт ахмадуудыг талцуулсан шийдвэр гаргалаа. Цагаан сараас өмнө зээл аваагүй ахмадуудад гурван сая төгрөг олгохыг шаардаж байна. Тэтгэврийн зээл тэглэх гэж байгаа юм бол зээлтэй, зээлгүй бүх иргэдэд тэгш хандах ёстой. Байгалийн баялагийг хуваарилах гэж байгаа юм бол тэгш хандах ёстой. Өдөр бүр Сүхбаатарын талбай дээр цуглаж гарын үсэг цуглуулна. Энд ирсэн ахмадууд бүгд ҮАБЗ-ийн шийдвэрийн эсрэг гарын үсэг зурсан. УИХ-ын гишүүдийн хэд нь ахмадуудаа өмөөрч дуугарсныг энэ сарын 9-ний өдрийни чуулганаас харсан байх. Тэтгэвэр нэмсэн гэсэн. Гэтэл хүүхдийг чихрээр хуурч байгаа юм шиг 10, 20 мянган төгрөг нэмдэг байсан. Үнэн биз дээ. Тэтгэврийг зээлийг тэгэллээ гэхэд дараа нь тэтгэврийн зээлийг нэмэхгүй, банк дахин зээл олгохгүй болж байна. Тиймээс ШИНЭ намын уриалгыг дэмжиж байна.

Яг үнэндээ бол танил талгүй ахмадууд хохирч үлдэж байна. Төрд 30 жил ажилласан иргэд яагаад хохирох ёстой юм бэ. Хадгаламж банкны 14 тэрбумыг луйвардсан хүмүүс улсыг хохиролгүй болго. Бид 300-700 мянган төгрөгийн тэтгэвэр авч байна. Улсынхаа төлөө насаараа зүтгэчихээд яагаад ийм хэмжээний тэтгэвэр авах ёстой юм бэ. Ахмадууд нийгмийн халамжийг хүртэж чадахгүй байна. Улсын чанартай эмнэлгүүд ахмадуудад хүрч үйлчилж чадахгүй байна. Тэтгэврийн хэдэн төгрөгөөсөө хумслаж, хувийн эмнэлэгт үзүүлж байна. Тиймээс тэтгэврийн зээлийг тэглэхийн оронд нэг бол тэтгэврийн хэмжээг нэм, эсвэл банкны хүүг бууруул" гэлээ.