Хотын дарга асан Э.Бат-Үүл холбогдох зөрчлийн хэргийн шүүх хурал энэ сарын 13 буюу өнөөдөр болж байна. Хэргийг эргэн сануулбал, өнгөрсөн 2018 оны зургадугаар сард "Ерөнхийлөгчийн шинэ томилгооны учир тодорч байна" гэсэн гарчигтай нийтлэл бичиж, олон нийтийн сүлжээгээр тараасан юм.

Уг нийтлэлийн хариуд Ерөнхийлөгч Х.Баттулга, Тамгын газрын дарга З.Энхболд нар гомдол гаргаж шүүхэд хандсан байдаг. Хэргийг цагдаагийн байгууллагаас шалгаад бөгөөд Э.Бат-Үүлийг бусдыг гүтгэсэн буюу Зөрчлийн хуулийн 6.21-д заасны дагуу хоёр удаа  дөрвөн сая төгрөгөөр торгох шийдвэрийг гаргасан юм.

Гэтэл хотын дарга асан Э.Бат-Үүл энэхүү торгуулийг хүчингүй болгуулахаар Сүхбаатар дүүргийн шүүхийн Эрүүгийн хэргийн анхны шатны шүүхэд хандсан юм. Хэргийн шүүх хурал хэд хэдэн товлогдож байсан ч удаа дараа хойшлогдож ирсэн. Хамгийн сүүлд энэ сарын 7-нд болох байсан шүүх хурал Ерөнхийлөгчийн Тамгын газрын дарга З.Энхболд шүүх хуралд өөрийн биеэр оролцох хүсэлт гаргасан учраас хойшлогдсон. Бат-Үүлийн хувьд өөрийгөө бусдыг гүтгээгүй, үнэн бодит зүйлийг өгүүлсэн хэмээн өөрийгөө өмгөөлж, мэдэгдсэн удаатай. 

Тэгвэл шүүх хурал өнөөдөр болж байгаа аж. Энэ талаар хотын дарга асан Э.Бат-Үүлд "Ардчилсан Үндсэн хууль батлагдсан өдөр Ерөнхийлөгчийн нэр төрд халдсан хэргээр шүүгдэгч болоод сууж байна" хэмээн жиргэжээ.