Эрчим хүчний яам болон Эрчим хүчний зохицуулах хорооноос “Эрчим хүчний тухай хууль” зөрчин, “Шарын гол” ХК-ийн нүүрсний үнийг хямдаар тогтоосон талаар тус уурхайн ажилчид өнөөдөр мэдээлэл хийсэн. Тодруулбал, Эрчим хүчний зохицуулах хорооны дарга А.Тлейхан нь тус уурхайн нэг тонн нүүрсийг 40 мянган төгрөгөөр тогтоож, энэ үнээрээ “Эрдэнэт” үйлдвэр зэрэг төрийн өмчит компаниудад худалдах шийдвэр гаргасан гэх бөгөөд үүний улмаас уурхай санхүүгийн хүндрэлд орж, 500 гаруй ажилчид ажилгүй болох эрсдэл тулгараад байгаа аж.
Тиймээс зохицуулах хорооноос тогтоосон үнийн хатуу бодлогыг чөлөөлөх хүсэлтийг гаргасаныг хэлсэн юм. Энэ талаар жагсагчид “Багануур, Шивээ-Овоо, Адуун чулуун уурхайд төрөөс татаас өгдөг байх. Харин “Шарын гол” уурхай нь 100 хувь хувийнх учир ямар ч татаас өгдөггүй. Эрчим хүч, түлшний үнээс хөнгөлөлт эдлэе гээд хүсэлт тавихаар “Тийм боломж байхгүй” гэдэг. Үүнээс болоод түлш, татвар, цахилгааны өр үүссэн. Татвараас данс хаах гээд байна. Дансны гүйлгээ хаавал ажилчдын цалингаа өгөх боломжгүй болно. Үнийн хатуу бодлогоос болж ажилчдын цалингаа нэмэх боломжгүй болчихоод байна. Уг нь өнгөрсөн 2018 онд цалингаа нэмсэн. 2020 онд дахиад нэмэхээр төлөвлөсөн боловч дээрх шалтгаанаас болж чадахгүй болчихоод байна. Бид бол хойд бүсийг цахилгаанаар хангаж байгаа эгэл жирийн уурхайчид.
Бид нэг тонн нүүрсийг 46-48 мянган төгрөгөөр олборлодог. Гэтэл улсад 40500 төгрөгөөр өгдөг. Ингэхээр алдагдал үүснэ биз дээ.
Одоогоор 8-9 хоногийн нөөц байгаа байх. Аль болох нүүрсний хангамжийг зогсоохгүй байхыг хичээнэ. Эрдэнэт үйлдвэрт 600-700 тн нүүрс нийлүүлдэг. Энэ нь нийт хэрэглээнийх нь 10 хүрэхгүй хувь. Хэрвээ үнийн хатуу бодлогийг чөлөөлөхгүй бол нүүрсээ өгөхгүй гэсэн бодолтой байгаа” гэсэн юм.
-Тиймээс бид мэдээллийг тэнцвэртэй хүргэх үүднээс Эрчим хүчний зохицуулах хорооны тайлбарыг хүргэх болно-
Г.Алимаа
Сэтгэгдэл (1)