УИХ-ын 2016 оны ээлжит сонгуульд хамгийн харамсалтайгаар өвдөг шороодсон гишүүд бол "Монос"-ын Л.Эрдэнэчимэг, Г.Уянга нар. Тухайн үеийн парламентийн хамгийн хүчирхэг эмэгтэйчүүдээр нэрлэгдэж байсан тэд парламентийн танхимаас тамхины тухай хуулийг санаачилж, батлуулахад ихээхэн үүрэг гүйцэтгэсэн. Гэвч "Цуутай хүүхэн хуримгүй" гэгчээр улс төр дагасан нөхөрлөл цааснаас хэврэг гэдгийг тэдний нөхөрлөл батлаад амжсан.

Төрийн ордонд сархад ууж, хөлчүүрхсэн үедээ архи, тамхи, секс гурав хүний насан туршийн хэрэглээ гэж хэлсэн үгэндээ ороогдсон Л.Эрдэнэчимэг, архины ширээний ард суусан найзынхаа согтуу бичлэгийг хийж цацсан хэрэгт унасан Г.Уянга нар 2016 оны ээлжит сонгуульд хамгийн түрүүнд бүдрэх хүмүүсийн жагсаалтыг өнгөлсөн.

Энэ нь батлагдаж гишүүний сэнтийгээс буусан хоёр хэсэгтээ нам гүм амьдарч байгаад Г.Уянга нь Ерөнхийлөгчийн Иргэний нийгэм, хүний эрхийн бодлогын зөвлөхөөр ажиллах болсон. Харин Л.Эрдэнэчимэг нь АН-ынхаа арын ажлыг амжуулахын зэрэгцээ хүүхэд, залуусын боловсролыг дээшлүүлж, хүн ардын эрүүл мэндийн манааг сахисаар өнөөдрийг хүргэв.

Тэгвэл дээрх хоёр гишүүн асангууд ирэх сонгуульд өрсөлдөх сурагтай.

Энэ талаар гишүүн асан Г.Уянга "Би АН-аас нэр дэвшинэ" гэдгээ ил цагаан зарласан бол Л.Эрдэнэчимэгийн хувьд ямар нэгэн мэдэгдэл хийгээгүй л байна. 

Өнгөрсөн хийгээд өнөөгийн парламентийн 30 хүрэхгүй хувийг эмэгтэй гишүүд эзэлсээр ирсэн. Эмэгтэй гишүүдийн чадавхгүй, сул дорой, мэдлэг чадвар дутуу гэж ангийн нөхдөөс нь  эхлээд ард түмэн ад шоо үзэж ирсэн. Ийн нүд үзүүрлэгдэж ирсэн ч 2012-2016 оны оны парламент дахь эмэгтэй гишүүд өнөөгийн парламентийн зарим эмэгтэй гишүүдээс харьцангуй хариуцлагатай, идэвх санаачилгатай байсан гэдэгтэй ард түмэн санал нэгдэх байх.

Гэвч Төрийн ордонд өнгөрсөн үйл хэрэг нь сайнаар үнэлэгдэх ч сархадын ард саваагүйтсэн түүхийг ард түмэн мартаагүй, мартахыг ч хүсэхгүй байх. 

Энэ ч үүднээсээ тэдэнд ирэх парламентад тухлах орон зай үлдсэн нь юу л бол. 

Г.Нацаг