Улсын Их Хурлын Хууль зүйн байнгын хорооны өнөөдрийн хуралдаанаар Мөнгө угаах терроризмыг санхүүжүүлэхтэй тэмцэх тухай хууль, Нягтлан бодох бүртгэлийн тухай хууль, Санхүүгийн зохицуулах хорооны эрх зүйн байдлын тухай нэмэлт оруулах тухай төслийг чуулганы хуралдаан суусан 45 гишүүдийн олонхийн саналаар баталлаа. Үүний дараа Эрүүгийн хуульд нэмэлт, өөрчлөлт оруулах тухай болон хамт өргөн мэдүүлсэн хуулийн төслүүдийг батлах санал хураалт явуулах үеэргишүүдийн дунд хүчтэй маргаан үүссэн. Тухайлбал, УИХ-ын гишүүн Х.Нямбаатар гурван тэрбум төгрөгөөс дээш ашиг олоод татвараас зугтаасан, татварын байгууллагад мэдэгдээгүй иргэн, ААН-д Эрүүгийн хуулиар торгох арга хэмжээ авах зохицуулалтыг хуульд тусгах ёстой гэж үзэж буй. Үүнийх нь хариуд зарим гишүүд ААН-ийг дарамтлах гэлээ гэж эсэргүүцсэн юм.

Тухайлбал,

Х.Болорчулуун: Монголд бизнес эрхлэх хэцүү л дээ. Үйлдвэрлэл сайн хөгжөөгүй, жижиг зах зээлтэй. Үйлдвэрлэгч гэхээсээ илүүтэй хэрэглэгч орон болсон шүү дээ. Та нар мэднэ биз дээ. Хоёр жилийн өмнө маскны татварыг тэглэх тухай яриад явж байсан. Үйлдвэрлэлийн салбар ийм хэмжээнд байна. Татварын дарамт дээрээс эрүүгийн хариуцлага хүлээлгэнэ гэвэл хэцүү юм болох байх. Оффшорын бүсэд мөнгө угаасан, нуусан хүмүүст эрүүгийн хариуцлага хүлээлгэх бол хоёр гараа өргөөд дэмжинэ. Х.Нямбаатар гишүүн зөрүүтэй мэдээлэл өгөх шиг боллоо. 300 мянган нэгж гэдэг нь гурван тэрбум биш 300 сая төгрөг юм аа. Бага тоо шүү. Захын жижиг аж ахуйн нэгжийн удирдлага, нягтлан бодохуудад эрүүгийн хариуцлага хүлээлгэх нөхцөл байдал үүсэх гэж байна. Ж.Ганбаатар гишүүний хэлдэг үнэн шүү.

УИХ-ын дэд дарга Л.Энх-Амгалан: Үүнийг анхаарах хэрэгтэй. Хуульд заасан ялын бодлогыг дахиж оруулж ирэх нь буруу шүү. Байнгын хороо хамт хэлэлцүүлсэн. Анхаарах хэрэгтэй.

Үүний дараа санал хураахад 44 гишүүн оролцсоноос 33 гишүүн эсэргүүцсэн учир  хуулийн төслийг хууль санаачлагчдад нь буцаалаа.

Г.Эрдэнэ