Өнгөрсөн оноос эхлэн УИХ гишүүн Н.Номтойбаярыг бүрэн эрхийг түдгэлзүүдэх тухай асуудал яригдаж буй.  

Эл явдлын дараахан Н.Номтойбаяр гишүүн олон нийтэд хандаж хийсэн мэдээлэлдээ хийсэн юм. Тэгвэл түүнийг мөрдөн байцаалтын нууцыг задруулсан болон бусад асуудлаар бүрэн эрхийг түдгэлзүүлэх эсэх талаар УИХ-ын Халдашгүй байдлын дэд хороогоор хэлэлцэх аж.

Гишүүний бүрэн эрхийг хугацаанаас нь өмнө УИХ-ын тухай хуулийн 31.1.1-д зааснаар Улсын Их Хурлын нийт гишүүний гуравны хоёроос доошгүй нь дэмжих ёстой. Хэрэв хуулийн байгууллагаас ирүүлсэн уг асуудлыг УИХ-ын чуулганаар оруулж, дэмжвэл энэ парламентын онцлох үйл явдал болох юм.

Н.Номтойбаяр гишүүний зүгээс ч гишүүний бүрэн эрхээсээ татгалзаж, шалгагдахад бэлэн байгаа гэх байр суурийг ч илэрхийлсээр буй. Учир нь гишүүнийг шалгаж болох ч түүний халдашгүй байдал, бүрэн эрх хэргийг шийдэхэд саад учруулдаг талаар хуулийн байгууллагынхан хэлдэг. Тийм ч учраас Н.Номтойбаярын бүрэн эрхийг түдгэлзүүлж өгөхийг хүссэн хэрэг. Тухайлбал, ЖДҮ-ийн асуудал сөхөгдөхөд ч тэр тухайн үед салбарын сайдаар ажиллаж байсан Б.Батзоригийг шалгахад гишүүний халдашгүй байдал саад болж байгаа талаар өмнөх Ерөнхий прокурор М.Энх-Амгалан чуулганаас хатуухан хэлж байсан удаатай.

Дээрх асуудалтай холбогдуулан Н.Номтойбаярын бүрэн эрхийг түдгэлзүүлэх эсэх талаар УИХ-аар хэлэлцвэл гишүүд дэмжих талаар тодруулахад “Тухайн асуудалтай нь танилцаагүй. Танилцсаных нь дараа шийднэ” гэсэн байр суурийг илэрхийлж байна.

ХХААХҮ-ийн сайд асан Б.Батзориг болон нэр бүхий Их хурлын бусад гишүүдийг хамгаалж авч үлдсэн шигээ түүнийг ч мөн авч үлдэж магадлалтай.

Гэхдээ өөрийн хүсэлтээр гишүүний бүрэн эрхээсээ түдгэлзсэн гишүүн асан Д.Гантулгын жишгийг үргэлжлүүлж чадвал “шударга бус зүйлтэй хатуу тэмцэнэ” гэж намын дарга бөгөөд Ерөнхий сайд У.Хүрэлсүхийн чуулганы индрээс хэдэнтээ хэлсэн үг ч биелэлээ олно гэсэн үг. Хамгаалж үлдэх үү, шударга бустай тэмцэх үү гэдгийг тус намын шийдвэрээс харах л үлдлээ.

Б.Лхам