Гишүүн Н.Номтойбаярын бүрэн эрхийг түдгэлзүүлэх эсэх асуудлыг Халдашгүй байдлын дэд хороогоор хэлэлцэх тов гарсан. Уг асуудлаар ХЗДХ-ийн сайд Ц.Нямдоржоос тодрууллаа.

-Прокуророос гишүүн Н.Номтойбаярын бүрэн эрхийг түдгэлзүүлэх ямар үндэслэл гаргасан юм бэ?

-Нарийн асуудлын талаар мэдээлэл өгөхгүй. Прокуророос нууц гэсэн дардастай бичиг ирсэн. Үүнтэй холбоотой хуралдаан нууцын хэлбэрээр явагдсан. Гуравдугаарт,  дотор нь байгаа асуудал нь мөрдөгдөж байгаа тодорхой хэрэг нь нууцтай холбоотой. Мөрдөгдөж байгаа хэргийн мэдээллийг прокурорын зөвшөөрсөн хэмжээнд мэдээлдэг хуулийн заалттай байдаг учраас нарийн мэдээллийг өгөх боломжгүй.

-Прокуророос ирүүлсэн албан бичгийн хариуг 48 цагийн дотор шийдвэрлэх ёстой. Хуулийн хугацаанд шийдвэрлэх боломжгүй гэж ярьж байна. Тэгвэл хугацааг сунгах боломж бий юу?

-Байхгүй. Одоо 48 цагийн хуулийн нөхцөл тодорхой бодитой шалтгааны улмаас зөрчигдөх нь байна гэж хэлсэн шүү дээ. Д.Лүндээжанцан гишүүн гадаад явсан гэдгийг мэдэлгүй санал оруулж ирсэн. 1-2 гишүүн байхгүй тохиолдолд энэ хороо хуралдах боломжгүй гэдгийг мэдээгүй юм байлгүй.

Ч.Улаан сайдын томилолтыг яах аргагүй мэдээгүй юм шиг байгаа юм.

Халдашгүй хорооны хуучин заалтад гишүүд санал нэгтэйгээр дүгнэлт гаргана гэж заасан байсан. Их Хурлын гишүүний бүрэн эрхийн цаана нэг хүний асуудал биш сонгогчдын төлөөлөх эрх, Засгийн газар тогтвортой ажиллах асуудал хөндөгдөж магадгүй улстөрийн аюултай асуудал байдаг учраас халдашгүй хороонд олон жил сонгогдсон гишүүдийн санал нэгтэйгээр оруулдаг хуулийн заалттай. Тухайлбал, 2004 онд Их хурлын АН-ын бүлгийн гишүүдийн тоо 38, МАН 34 байсан. Тухайн үед Ц.Элбэгдорж Ерөнхий сайд байсан. Нэг л гишүүний бүрэн эрхэд халдаад түдгэлзүүлчихвэл Засгийн газар солигдох үр дагавар байсан үе. Энэ бүрэлдэхүүний шийдвэр гаргадаг саналын цаана ийм нарийн зүйл байдаг. Үүнийг залуу төлөөлөл та бүхэн мэдэх шаардлагатай. Тиймээс албан томилолтоор явсан хоёр гишүүнийг ирэхээр шийдье гэж тохирсон.

-Гишүүний бүрэн эрхээс татгалзах саналыг дахин оруулна гэсэн үг үү?

-Үгүй. Үргэлжлүүлээд хурлаа хийгээд явна. Томилолт өгснөөс болоод ийм асуудал үүслээ.

-Н.Номтойбаяр гишүүнийг хуралд байлцуулах талаарх мэдээллийг хүргүүлсэн үү?

-Хуралдаанаар ирүүлнэ.

-Хороо нээлттэй хуралдвал сууна гэж мэдэгдсэн. Нээлттэй явуулах боломж бий юү?

-Боломжгүй. Нууцын зэрэглэлтэй учраас түүний саналаар асуудлыг нээлттэй явуулах бололцоогүй.

Б.Лхам