Дубайн гэрээ гэж дуусдаггүй маргаан дагуулсан, дагуулсаар ч байх тавилантай нэг гэрээ байна аа. Өмнийн говьд шинэ зууны бүтээн байгуулалтыг өрнүүлж, дэлхийн хэмжээний технологийг Монголд нутагшуулахад түлхэц өгсөн сайн төсөл хөтөлбөр ч гэлээ, ус хэмээх чандмань эрдэнийг гамгүй хэрэглэж буйтайгаа тэнцэх хэмжээний үр өгөөжөө монголчуудад өгөхгүй байгаа нь иргэдийн дургүйцлийг төрүүлэх гол хүчин зүйл болоод буй.

Оюутолгойн хөрөнгөн оруулалтын гэрээ 2009 оны аравдугаар сард байгуулагдсан гэхээр бүхэл бүтэн 10 жилийн хугацаанд сайн муугаар дуудуулж ирсэн энэхүү хөтөлбөрийн буянаар Монголд багагүй хөрөнгө оруулалт орж ирсэн үү, ирсэн.

Оюутолгойн хөрөнгө оруулалтын гэрээ, Дубайн гэрээнд холбогдох хэргийг Монголын найман настай хүүхдээс наян настай хөгшид нь хүртэл андахаа байсан алдартай хэрэг. Эл гэрээнд өөрчлөлт оруулна гэж олон ч жил ярьсан, олон ч жил ард түмэн хүлээсэн. Үе үеийн парламентад тухалсан улстөрчид эл сэдвээр шоу хийж гарч ирээд чимээгүй болдог тогтсон жишигтэй болсон. Гэрээг байгуулахад албан тушаал, эрх мэдлээ урвуулан ашигласан байж болзошгүй хэргээр Ерөнхий сайд С.Баяр, Ч.Сайханбилэг, Сангийн сайд С.Баярцогт нарт холбогдох хавтаст хэрэг прокурорын байгууллагын үүдийг давснаас хойш тоосонд даруулан хэвтсээр байна.

Учир нь ард түмний мэдэж буйчлан Ерөнхий сайд асан Ч.Сайханбилэг эрх чөлөөний орон америк руу зугтаагаад хэдийнэ хоёр сар гаруйн хугацаа өнгөрөв.

Гэвч түүний байршлийг тогтоосноос бусдаар ахиж дэвшилтэй гэх зүйл гарсангүй. Гарсангүй ч гэж дээ.

Хэргийн араас АТГ-ынхан хөөцөлдөж байгаа. Гэхдээ Монгол, Америк хоёр улсын хооронд энэ мэт хэрэгт буруутгагдаж эрэн сурвалжлагдаж байгаа этгээдийг солилцох гэрээ энэ тэр гэх юм байхгүй. Үүнийг ч сайн мэдэх учир Ч.Сайханбилэг оргон зайлсан. Хэзээ, яаж авчрах нь тодорхойгүй, тодорхой болох боломж бий эсэх нь ч мэдэгдэхгүй. Ганц байгаа боломж нь интерполтой хамтрах байдлаар авчрах. Эхний ээлжинд байршил тогтоох хүсэлт явуулсны дагуу америкт бийг нь олж мэдсэн. Одоо үлдсэн ганц арга нь дайчлан авчруулах. Гэхдээ үүний тулд Монголын шүүхээс Ч.Сайханбилэгийг эрэн сурвалжилж байна, дайчлан авчрах ёстой гэсэн утга бүхий шийдвэр гаргах ёстой. Энэ хүрээнд цагдаагийн байгууллагаас түүнийг эрэн сурвалжилж буй зарыг цахим хуудастаа байршуулсан. Одоо үлдсэн ганц алхам нь шүүхийн шийдвэрээ интерполд гардуулж, оргож зугтаасан Ч.Сайханбилэгийг авчруулах. Гэвч шүүхийн шийдвэрийг гардуулаад л түүнийг гавлаад аваад ирэх юм шиг амарханаар төсөөлж бас болохгүй гэнэ. Бичиг цаасны ажлаас эхлээд олон ч хүний зөвшөөрөл энэ тэр шаардагдах юм байх. За энэ ч ойлгомжтой.

Хамгийн гол нь УИХ-ын 2020 оны ээлжит сонгууль хаяанд дөхсөн энэ цаг үед Оюутолгойн гэрээтэй холбогдох хэргийг нэг тийш шийдэхгүй бол парламент солигдох мөчид хэрэг замхрах эс бөгөөс хэрэгт буруутгагдсан этгээдүүд ял завших вий гэсэн болгоомжлол нийгэмд үүсээд байна. Хэдийгээр хэргийн хөөн хэлэлцэх хугацааг зогсоосон ч гэлээ төрийн өндөр албан тушаалд тухалж үзсэн, авлига, албан тушаалын хэрэгт нэр холбогдож үзсэн этгээдүүд хуулийн хийдлийг олохдоо гаршсан байх нь элбэг. Үүнийг нь өнгөрсөн үеийн олон хэргээс харж болно. Тиймээс л өдөр хоног өнгөрч, 51 мянган хувьсагч нарын хэрэг замхрах вий. 

Г.Маргад