Өнөөдөр Сүхбаатарын талбайд Нийслэлийн автозамын түгжрэлийг бууруулах, нийтийн тээврийг хөгжүүлэх цогц төслийг олон нийтэд танилцууллаа.
Энэ үеэр Засгийн газрын хэрэг эрхлэх газрын дарга Л.Оюун-Эрдэнэ "Улаанбаатар хотын автозамын түгжрэлийг бууруулахад олон төрлийн тээврийн хэрэгслийг ашиглах нь үр дүнтэй. Өөрөөр хэлбэл, гэр хорооллын зарим хэсэг рүү агаарын дүүжин тээврийг ашиглах боломжтой. Мөн соронзон тээвэр буюу автозамын дээгүүр соронзон тээврийн хэрэгслийг ашиглах боломж бий. Газар чөлөөлөлтийн асуудал хүндрэлтэй байгаа манай орны нөхцөлд энэ төрлийн тээврийн хэрэгслийг тохирно гэж үзсэн учраас ТЭЗҮ боловсруулсан. Гурав дахь сонголт нь тусгай замыг автобус. Үүнд сурагчдын автобус багтана. Сурагчдын амралт эхлэхээр автозамын түгжрэл тодорхой хэмжээгээр буурч байгаа нь сурагчдын тээврийн асуудлыг шийдэх ёстойг харуулж байгаа юм. Дөрөв дэх шийдэл нь Богд уулыг тойруулсан хурдны нэг, хоёрдугаар колцо хийх. Ингэхдээ есөн гарцыг төрөлжүүлэн зохион байгуулна. Эдгээрийг шийдэж чадвал Улаанбаатар хоын автозамын түгжрэлийг 5-6 жилийн хугацаанд бүрэн шийдвэрлэх боломжтой болох юм. Эдгээрийн ТЭЗҮ-г Засгийн газрын хуралдаанаар танилцуулсан.
Францын Засгийн газар болон Францын ЭКСИМ банктай хамтарсан зээлийн санхүүжилтээр шийдэх боломжийг хотын дарга танилцууллаа.
Энэ асуудлыг Засгийн газар, Их хурал, ЗТХЯ, НЗДТГ зэрэг байгууллагууд хамтарч ажиллаж байж шийднэ. Өнөөдөр ТЭЗҮ танилцууллаа. Үүний цаана 2-3 алхам үлдсэн" гэлээ. Үүний дараа сэтгүүлчдийн асуусан асуултад хариулт өглөө.
-Аюулгүй байдал талаасаа хэр баталгаатай бэ?
-Найдвартай. Аялал жуучлал хөгжсөн улс орнууд ийм төрлийн тээврийн хэрэгслийг өргөнөөр хэрэглэдэг.
-Цаг агаарын нөхцөл нь тохирох уу?
-Монголоос хүйтэн цаг агаартай улс орнууд ашигладаг. Эдгээр шийдлийг зөвхөн бид гаргаж ирсэн юм биш. Гурван улсын эрдэмтэд хамтарч судалсны үндсэн дээр танилцуулж байгаа зүйл.Хамгийн хямд өртөгөөр, хамгийн хурдан хугацаанд шийдэх боломжит гарц гэж үзсэн. Агаарын бохирдлыг хамтдаа бууруулж чадсан шиг түгжрэлийг бууруулах боломж нийслэлчүүдэд бий. Гол нь хамтарч ажиллах ёстой.
Г.Маргад
