Өнөөдөр Сүхбаатарын талбайд Нийслэлийн автозамын түгжрэлийг бууруулах, нийтийн тээврийг хөгжүүлэх цогц төслийг олон нийтэд танилцууллаа. Энэ үеэр Нийслэлийн Засаг дарга бөгөөд Улаанбаатар хотын захирагч С.Амарсайханаас дараах зүйлийг тодрууллаа.

-Төсөл бүрэн хэрэгжинэ гэсэн баталгаа өгч чадах уу. Өмнө нь автозамын түгжрэлийг бууруулахаар олон төсөл хөтөлбөр эхлүүлсэн. Гэтэл эцэстээ төсвийн мөнгийг үр зарцуулсан асуудал үүссэн шүү дээ?

-Сонгуулиас сонгуулийн хооронд амлалт өдөг, ажил хийсэн болдог ийм тогтолцоо байж болохгүй. Бидний гаргасан шийдэл, танилцуулсан ажил бол хотын түгжрэлийг бууруулахын төлөө хийсэн зүйл. Түүнээс биш болохгүй, бүтэхгүй зүйлийг хийх гэж, эсвэл улс төрийн оноо авах гэж хоосон амалдаг үе ард хоцорсон шүү дээ. Ялангуяа хотын удирдлагуудын зүгээс иймэрхүү явуургүй үйлдэл гаргах нь зохисгүй. Нөгөө талаасаа Ерөнхий сайд, Засгийн газрын зүгээс хотын түгжрэлийг бууруулах, нийтийн тээврийн шинэчлэлийг хийх үүрэг өгсөн. Энэ дагуу бүх тооцоо судалгаа хийж, санхүүжилтийн асуудлыг танилцууллаа. Өнөөдөр танилцуулсан тээврийн хэрэгслийн шийдэл бол бүрэн хэрэгжих боломжтой. Бүх тооцоо, судалгааг нь хийсэн. Газар нутаг, цаг агаарын онцлогийг тооцож үзсний үндсэн дээр олон төрөлт тээврийн хэрэгслийг ашиглах нь зүйтэй гэж үзсэн. Олон төрөлт болгоно гэдэг нь иргэдэд сонголт хийх боломжийг олгоно гэсэн үг. Нийтийн тээврийн салбар жилд давхацсан тоогоор 270 сая зорчигч тээвэрлэдэг байсан. Гэтэл өнөөдөр 180 сая болтлоо буурсан байна. Энэ бол сонголт байхгүйтэй холбоотой. Нөгөө талаасаа аюулгүй байдал,стандарт хангахгүй байгааг харуулж байна.

-Агаарын такси төсөл хэзээнээс эхлэх бэ?

-Энэ жилийн дөрөвдүгээр сараас эхлүүлэхээр төлөвлөж байна. Энэ жилдээ амжиж эхэлбэл ирэх жилийн зургадугаар сард эхний маршрут буюу Баянхошуу, Ханын материал, III, IV хороолол гэсэн чиглэл ашиглалтад орно.

-Үнэ тарифны хувьд ямар байхаар тооцоолсон бэ?

-Нийтийн тээврийн үйлчилгээний үнэ тарифтай уялдуулна. Цагт 3000 хүн тээвэрлэнэ гэхээр өдөрт дунджаар 40 гаруй мянган хүн тээвэрлэх тооцоо бий.

-Аюулгүй байдлыг хэрхэн хангах бэ?

-Автомашин зэрэг тээврийн хэрэгслийг бодвол хамгийн аюул багатай тээврийн хэрэгсэлд тооцогддог. Өөр хоорондоо мөрдөлдөх, уралдах асуудал байхгүй. Энэ утгаараа дэлхий нийтэд энэ төрлийн тээврийн хэрэгслийг түгээмэл ашиглаж байна. Цаг агаарын нөхцөлийн хувьд -50-иас +50 градуст ашиглах боломжтой.

Г.Маргад