Цагдаагийн хурандаа хоёр пентхаус, 30 ширхэг орон сууц өгөхийг шаардаж, өгөхгүй гэхэд 320 сая төгрөг бэлнээр өг гэж дарамталсан талаар “Иргэдийн шударга шүүх” ТББ-аас мэдээлэл хийлээ.

Энэ талаар “Бавар” компанийн захирал Х.Оюун “Манай компани 2015 оны есдүгээр сарын 4-ны өдөр Цагдаагийн ерөнхий газрын албан хаагчдын нэг хотхоны барилгын ажлыг гүйцэтгэхээр гэрээ байгуулсан юм. 2015-2017 онд миний ээж А.Хажидмаа уг ажлыг гүйцэтгэж яваад 2017 онд таалал төгссөн. Улмаар миний бие үргэлжлүүлэн гүйцэтгэж байна. Талийгаачийг өнгөрөөд долоо ч хоноогүй байхад нэр бүхий этгээд “Алба хаагчдын өмнө хэн хариуцлага хүлээх юм, ажлаа хэн хийх юм” зэргээр утсаар дарамталдаг байсан.

       2015-2017 онд ажлын хэсэг нэртэй нэр бүхий хурандаа нар арматур буулгасан нэрээр 927 сая төгрөгийн авлига авсан. Энэ нь санхүүгийн тайлангаар нотлогддог. Үүнээс үүдэн манай компанийн үйл ажиллагаа хүнд байдалд орсон. Манай компанийн зүгээс дөрвөн блоктой 376 айлын орон сууц байсан. Гэтэл бидний хүлээж авсан нь А блок буюу 16 давхар барилгын цонхийг битүүлсэн байдалтай, доторх ажил нь хийгдээгүй. Одоо ашиглалтад орох гэж байгаа барилгын есөн давхрын угсралтан дээрээ гацсан байдалтай хүлээж авсан. Манай компани гэрээгээ биелүүлэхийн тулд маш их хэмжээний зээл авснаас гадна тухайн хүмүүс тэрбум орчим төгрөг идчихсэн. Ийм хүнд байдалд байсан. Ажлаа цааш үргэлжлүүлье гэхээр алба хаагчид гэрээний үүргээ биелүүлдэггүй ийм байдал нь хамтран ажиллагч туслан гүйцэтгэгч нарыг хохироож эхэлсэн. Мөнгөө өгөөгүй юм байж ажил хийхийг шаарддаг. Улмаар ажлаа явуулахын тулд банк бусаас өндөр хүүтэй зээл авдаг. 

       Мөн цагдаагийн нэр бүхий хурандаа “ашиглалтад орчихсон пентхаусаас хоёр байр зүгээр өг. Ашиглалтад ороогүй В, Г блокоос 30 ширхэг байр үнэгүй өг” гэсэн. Уг нь энэ мөнгийг ажил хийсэн хүмүүст өгөх ёстой. Би мөнгө авах ёстой хүн нь шүү дээ. Гэтэл “мөнгө өгөхгүй бол барилгын ажлыг саатуулна. Хэрэв миний үгээр байхгүй бол чи өрөө төлж чадахгүй, шоронд явна” гэж дарамталдаг. Барилга барихад төрийн бүх байгууллагаас зөвшөөрөл авдаг. Тэр зөвшөөрлийг авах маш их хэцүү. Авлига авна. Хоолонд орно, архи дарс ууна. Би бүх зүйлийг нүдээрээ харсан. Маш олон компаниуд ажлаа бүтээхийн тулд мөнгө өгдөг юм байна. Бүгд мэдэж байгаа. Яагаад тэдэнд мөнгө өгч байж ажлаа бүтээх ёстой юм бэ.

Одоогоос тав хоногийн өмнө ажлын хэсгийн дарга гээд байгаа хүний найз нь над дээр ирсэн. “Чи тэр хүнээс уучлалт гуй. Энэ хүнийг дийлэхгүй. Амьдралаараа тоглуулна. Чи буруугүй ч буруу тохоод явуулчихдаг байхгүй юу” гэсэн. Тиймээс би шалгуулмаар байна.

Хуулийн сайд аа, энэ хурандаа нар чинь яагаад авлига нэхээд байгаа юм бэ.

Намайг дарамталж, юм нэхсэн хэрнээ "За яахав, чиний нөхцөл байдлыг ойлгоод 320 сая төгрөг бэлнээр авъя" гэсэн. "Та 30 байр авахаа болилоо. Ашгүй дээ" гээд би нэхсэн мөнгийг нь өгөх юм уу. Биднийг хамгаалах ёстой хуулиар яагаад буцаагаад биднийг дарамтлах ёстой юм. Өрөөндөө дуудчихаад гэсгээн цээрлүүлж байгаа юм шиг хоёр, гурав, дөрвөн цаг хүлээлгэдэг” гэсэн юм.

Б.Лхам