УИХ-ын Ёс зүйн дэд хороогоор хөрөнгө орлого нь огцом нэмэгдсэн гэх гурван  гишүүний асуудлыг хэлэлцжээ. Энэ талаар Дэд  хорооны дарга Б.Бат-Эрдэнээс дараах тайлбарыг авлаа.

Ёс зүйн дэд хорооны хурлаар хөрөнгө орлого нэмэгдсэн гэх гурван гишүүний асуудлыг хаалттай хэлэлцлээ. Ямар санал дүгнэлтэд хүрсэн бэ?

-Хуралдааны дэгээр асуудал явна. Олонх, цөөнхийн саналаар асуудлыг шийднэ. Нийт гишүүдийн гуравны хоёроор ирц бүрдэж, санал хураалт явах ёстой. Хурлаар хуулийн дагуу ёс зүйн зөрчилтэй асуудалд холбогдсон гишүүдийг байлцуулж, тайлбар авсан. Гуравны хоёроор санал хураасан. Дэд хорооны эрхлэх асуудлын хүрээд ямар нэгэн асуудал байхгүй. Техникийн алдаа гарсан байна гэж үзсэн. УИХ-ын гишүүдэд тус бүрт нь зөвлөмж өгсөн.

-Техникийн алдаа гэдгийг тайлбарлаж өгөөч?

-Янз бүрийн ТББ байгуулсан, тэнд ажиллаж байсан эсэхээ бүртгүүлээгүй байгаатай холбоотой асуудал гарсан. Тэр бүхэнд нь үндэслээд олонхийн шийдвэр гарсан. УИХ-ын гишүүн төдийгүй төрийн албан хаагчид хөрөнгө орлогоо мэдүүлдэг. Тиймээс туйлын анхаарал болгоомжтой бөглөх ёстой. Холбогдох хуулийн хэлтсээсээ зөвлөгөө авах ёстой.

-Нэр дурдагдсан гурван гишүүнийг хөрөнгө нь нэмэгдсэн гэсэн үндэслэл байхгүй гэж ойлгож болох уу?

-Янз бүрийн буруу ойлголтоо ийм асуудал үүссэн байна лээ. Бид уучлахгүй хөдөлгөөнийнхөнтэй уулзаж, учраа олсон гэсэн. Бусад улсын парламентад мөрдөн шалгах үйл ажиллагаа явуулах дэд хороо гэж байдаг. Манайд байхгүй. Гэхдээ УИХ-ын гишүүнтэй холбоотой ёс зүйн асуудлыг шийдэх, зөвлөмж, сануулга өгөх үүрэг хүлээдэг. УИХ-ын гишүүний ёс зүйн зөрчилтэй холбоотой асуудлыг шийддэг. Бүрэн эрхийг түдгэлзүүлэх эсэх асуудлыг нь хуулийн байгууллага шууд татаж авах зохицуулалтыг хуульд оруулах шаардлагатай юм байна.

С.Сүлд