Г.Батхүү агсны амиа алдсан хэргийн талаар түүний ар гэр болон хэргийн өмгөөлөгч н.Батхуяг нар мэдээлэл хийсэн билээ. Энэ үеэр “Хохирогчийн ар гэрийхэн рүү нэр бүхий этгээд хэргийн талаар харсан. Надад 13 секунтын бичлэг бий" гэж холбогдсон гээд харилцан ярилцсан чатыг үзүүлсэн юм. Энэ талаарх мэдээллийг шалгаж үзэхэд хэн болох нь тогтоогдсон ч цагдаагийн байгууллагаас мэдүүлэг авахад "Мэдэхгүй, хараагүй" гэдгийг мөн хэлсэн. 

Тэгвэл дээрх мэдээлэл цацагдсаны дараа хэргийн гэрч гэх хүн хэн бэ гэх асуудал олны дунд өрнөөд байна.

Талийгаачийн ар гэрийнхэний дэлгэсэн баримтад "Би гар утсандаа мэргэжлийн хөл хийгээд сурвалжлага хийдэг.

Тухайн өдөр хийсэн сурвалжлагынхаа тоймыг бичих санаатай цонхны тавцан дээр утсаа байрлуулаад байж байтал хөлний цэнэг дуусч байгаа дохио өгсөн. Ингэхээр нь баганы хажууд тавьсан цүнхнээс нөөц зайгаа авах гээд суутал "Чи муу п... Зүгээс ингээд намайг доромжлоод гарна гэж байхгүй шүү" гээд хэн нэгэн чанга дуугарсан. Энэ үед халь өндийгөөд харах үед алуурчин шууд дагз руу нь хүчтэй цохиод авсан. Талийгаач урагшаа нэг алхангаа хойшоо эргэж харах гэснээ доошоо унасан. Унангуут нь алуурчин шууд буцаад гүйсэн. Тэгэхээр нь доошоо бууж харах гэж байгаа юм болов уу гэж бодоод утсаа аваад араас нь гүйсэн. Тэгсэн чинь гэнэт өөдөөс гараад ирсэн. Би бантсандаа юу ч болоогүй юм шиг царайлаад зөрөөд буусан" гэх зэргээр бичжээ. 

Эндээс үзвэл, талийгаач Г.Батхүү агсны үхлийг гэрчлэх гэрч байж мэдэхээр байна. Хэрвээ үнэхээр ийм гэрч байгаа бол энэ хэрэг хэзээ илрэх нь цаг хугацааны асуудал болж хувирах нь дамжиггүй.

Учир нь УИХ-ын гишүүн Н.Номтойбаярыг талийгаачтай уулзсан хамгийн сүүлийн хүн гэх бөгөөд түүнээс хуулийн байгууллагаас мэдүүлэг авсан ч худал мэдүүлэг өгсөн гэх мэдээлэл цацагдаад буй. Түүгээр зогсохгүй түүний гишүүний бүрэн эрхийг түдгэлзүүлэх саналыг Улсын Ерөнхий прокурор Б.Жаргалсайхан гаргасан. Уг асуудлыг УИХ-ын Халдашгүй байдлын дэд хороогоор хэлэлцэх ёстой ч тодорхой шалтгаанаар хуралдаан хойшилсоор байгаа юм. Уг саналыг прокурорын байгууллагаас нууцын зэрэглэлтэй хүргүүлсэн ч дээрх процесстой холбоотой асуудал тусгагдсан байсан гэдгийг Хууль зүй, дотоод хэргийн сайд өчигдөр хэвлэлийнхэнд онцолж хэлсэн юм.

Харин энэ талаар УИХ-ын гишүүн Н.Номтойбаяр өөрийн цахим хуудастаа "АПУ-гийн NTV ийм "кино" зохиол бичээд Ундралжаргалт нь хэвлэлээр зохион байгуулалттай тараах гэж байгаа юм байна. Цагдаад шалгуулахаар одоо өгнө. Цагдаа хэргийн бодит үнэний талаар мэдээлэл хийхийг шаардаж байна" гэжээ. 

Хэрэг явдал хаашаа эргэж, үнэхээр гэрч бий эсэх асуудал тодорхой болоогүй байна.

Гэлээ гэхдээ үнэхээр дээрх баримт гэх зүйл нь үнэн байгаад хэргийг харсан, гэрчлэх этгээд гарч ирвэл өнөөгийн улс төрд эргэлт гарах нь дамжиггүй.

Талийгаач Г.Батхүү нь 1991 оноос Шунхлай группийн захирлаар ажиллаж байгаад 2004, 2008, 2012 онуудад УИХ-ын гишүүн, 2000 онд Дэд бүтцийн хөгжлийн сайд, 2004 онд Зам, тээвэр, аялал жуулчлалын сайд, УИХ дахь Ардчилсан зөвлөл АН-ын дэд дарга, УИХ-ын дэд даргааар ажиллаж байсан төр, нийгмийн зүтгэлтэн юм.

Г.Маргад

Хэвлэлийн хурлыг бүрэн эхээр нь хүлээн авна уу.