Хууль зүй, дотоод хэргийн сайд Ц.Нямдорж “УИХ-ын гишүүн хүн саналаа цаасаар өгнө гэж байдаггүй. Их Хуралд санал өгдөг хоёр зарчим бий. Цахим эсвэл гар өргөж л санал өгдөг” гэж мэдэгдлээ.

Ингэж мэдэгдсэн шалтгаан нь УИХ-ын гишүүн Н.Номтойбаярын бүрэн эрхийг түдгэлзүүлэх эсэхэд өөрийн саналаа нууцаар буюу цаасан хэлбэрээр өгөөд Герман Улсад болох хуралд явсан. Надаас болж УИХ-ын Халдашгүй байдлын дэд хороо хуралдаж чадаагүй. Н.Номтойбаяр гишүүний бүрэн эрхийг түдгэлзүүлэх асуудал надаас болж хойшлогдсон гэдэг зүйл худлаа гэдгийг энэ сарын 21-нд УИХ-ын гишүүн, ХХАААХҮ-ийн сайд Ч. Улаан мэдэгдээд байсан юм. 

Тэгвэл Ч.Улаан сайдын эл мэдэгдэлд Хууль зүй, дотоод хэргийн сайд Ц.Нямдорж ийнхүү сөргүүлэн тайлбар хийлээ. 

Асуудлыг нэхэн сануулбал, УИХ-ын гишүүн Н.Номтойярын бүрэн эрхийг чөлөөлж өгөх албан бичгийг өнгөрсөн долоо хоногт буюу энэ сарын 16-нд Улсын Ерөнхий прокурор Б.Жаргалсайхан УИХ-ын Халдашгүй байдлын дэд хороонд хүргүүлсэн юм.  

Уг асуудлаар Халдашгүй байдлын дэд хороо хуралдах ёстой байсан ч гишүүд гишүүд гадаад улсад томилолтой байсан учир хойшилсон. Энэ талаар ХЗДХ-ийн сайд Ц.Нямдорж “Дэд хорооны 1-2 гишүүн байхгүй тохиолдолд энэ хороо хуралдах боломжгүй байдаг. Их Хурлын гишүүний бүрэн эрхийн цаана нэг хүний асуудал биш сонгогчдын төлөөлөх эрх, Засгийн газар тогтвортой ажиллах асуудал хөндөгдөж магадгүй улстөрийн аюултай асуудал байдаг учраас халдашгүй хороонд олон жил сонгогдсон гишүүдийн санал нэгтэйгээр оруулдаг хуулийн заалттай. Тиймээс гишүүдийг цуглахаар Н.Номтойбаяр гишүүний бүрэн эрхийг цуцлах эсэх асуудлыг шийднэ” гэж мэдэгдээд байсан юм.

Б.Лхам