Түүхий нүүрсний хэрэглээнд хяналт шалгалт хийх НМХГ, ЦЕГ, НОБГ нарын хамтарсан ажлын хэсэг 24 цагаар ажиллаж буй. Энэ хүрээнд ажлын хэсгээс хоногийн мэдээ танилцууллаа.
Тодруулбал, өнгөрсөн шөнийн байдлаар таван хүүхэд, есөн том хүн угаарын хийнд хордож эмнэлгийн тусламж, үйлчилгээ авчээ.
НМХГ-ын дэд дарга С.Даваасүрэн “Мэргэжлийн хяналтын байгууллага сар бүр “Тавантолгой түлш” ХХК-ийн бүтээгдэхүүнд хяналт хийгддэг. Арванхоёрдугаар сарын байдлаар чийглэг байдал, хүхэр, илчлэг, бат бөх байдлыг шинжлэхэд стандартын шаардлага хангаж байна гэж гарсан. Шинжилгээг АМГТГ хийсэн. Мөн түүхий нүүрс түлэх зөвшөөрөлтэй аж ахуйн нэгжийн үйл ажиллагаанд хяналт тавьсан. Шалгалтаар зарим аж ахуйн нэгжийн үнс баригч нь ажлаагүй байна. Өөрөөр хэлбэл, тоосжил их үүсгэж байна. Үүнтэй холбогдуулан Зөрчлийн тухай хуулийн холбогдох заалтын дагуу 1.5 сая төгрөгийн торгууль тавьж ажиллалаа. Шалгалтын ажиллагаа дулааны улирал дуусах хүртэл үргэлжилнэ.
Түүнчлэн мэдрэгч суурилуулсан айлуу зөвлөмжийн дагуу суурилуулахгүй бол болохгүй байна. Үүнтэй холбоотой дуудлага ирсэн. Тодруулбал, долоон сартай жирэмсэн эх дохиолол нь дугарахад 37 ppm гэж заасан байжээ. Өглөө нь толгой нь дүүрч, бие нь зовиуртай болж яаралтай түргэн тусламжийн төвд хандсан. Хөнгөн хордлоготой байсан тул ямар нэгэн аюулгүй өнгөрлөө. Тиймээс дохиолол дугарсан л бол зааврын дагуу ач холбогдол өгөх хэрэгтэй. Ингэхгүй бол мэдрэгч дугарсны хэрэг алга” гэдгийг учирлаж байлаа.
Б.Лхам
