УИХ-ын хаврын ээлжит чуулганаар аймаг, сум, нийслэлийн ИТХ-ын сонгууль болон хамт өргөн мэдүүлсэн бусад хуулийн төслийг хэлэлцэж байна. Энэ үеэр гишүүд үг хэлж, асуулт асуулаа.

УИХ-ын гишүүн М.Оюунчимэг: Бид хууль дүрэм гаргаад л байдаг. Бодит байдал дээр гажуудал бий болоод байна. Орон нутагт улстөржилт нэлээд их. Элдэв халамж дээр хүртэл улстөрrилт бий болгодог. Үүний гол шалтгаан нь дарга нар өөрийн гарын хүмүүсээ томилдог. Улмаар өөрийг нь томилсон даргатаа нөгөө цэрэг нь үйчилдэг. Бараг гудамжинд байгаа хогийг "УИХ-ын гишүүнд хэлээд ачуулчих уу" гэсэн зүйл ярих гээд байна. Амин сүнс нь улстөржилтийг багасгана гэж байна. Яаж хийх юм бэ.

УИХ-ын гишүүн Х.Нямбаатар: Улстөржүүлж байгаа хүмүүс нь бид өөрсдөө. Аймаг, орон нутгаасаа санал авахын тулд энэ аймгийн нутгийн холбоо гээд ярьдаг биз дээ. Үүний ард хэн байна. Бид өөрсдөө л сууж байна. Камер харахаараа бүгдээрээ орон нутгийн сонгуулийг улстөржилтгүй явуулъя гэх юм. УИХ-ын сонгууль болоход сонгогдъя л гэж явна. Үүнийг мэдсээр байж асуух нь утгагүй асуудал.

УИХ-ын гишүүн Ц.Цогзолмаа: Монгол Улсын хөгжил орон нутгийн хөгжлөөсөө хамаарна. Шилжилтийн 30 гаруй жилд Нутгийн өөрөө удирдах байгууллагыг бэхжүүлэх чиглэлээр ажиллаж байна. Иргэдийн хурлын төлөөлөл болж байгаа хүмүүс өөрсдийгөө эрхтэн дархтан болж байгаа юм шиг ойлголтоо цэгцлэх хэрэгтэй. Хэдийгээр улстөрийн намууд албан тушаал, нэр дэвших эрхийг олгож байгаа ч Нутгийн өөрөө удирдах эрх зүйг бүрдүүлж буй субъект болж байгааг ойлгох хэрэгтэй. Нэг зүйлд Х.Нямбаатар гишүүнтэй санал нэг байна. Орон нутагт хүний нөөцийн чадамж төдийлөн сайн биш байна.

Б.Лхам