ЗГХЭГ-ын дарга Л.Оюун-Эрдэнэ Дубайн гэрээтэй холбоотой асуудлаар мэдээлэл хийлээ.

Тэрбээр “Урд хөршөөс эрчим хүч авч байгаа асуудлыг хэрхэн дотоодын эргэлтэд оруулах болон татварын маргааны асуудал үүссэн. Татварыг Монгол Улсын хуулийн дагуу хэрхэн шийдвэрлэх вэ гэдэг дээр ажлын хэсэг гаран ажиллаж байна. Арбитрын шүүхэд хандах нөхцөл байдал ч үүсч болзошгүй. 

Дубайн гэрээтэй холбоотой гэж яригддаг гүний уурхайн далд төлөвлөгөөтэй холбоотой асуудал үүссэн. Шүүх дээр явж байгаа нөхцөл байдлыг дүгнэж ярилцана. Мөн цаашид гэрээг хуулийн хүрээнд хэрхэн сайжруулах, хууль тогтоомжид нийцүүлэх талаар тусгай ажлын хэсэг байгуулсан. Засгийн газрын зүгээс жижиг хувьцаа эзэмшигч бүх компаниудтай хамтарч ажиллах сонирхолтой байгаа талаар байр сууриа нэгтгэсэн. Далд уурхайн бүтээн байгуулалт цааш явах ёстой. Нөгөөтээгүүр, ногдол ашиг тараах асуудал хойшилсон. Учир нь удирдлагын зарлага руу олон улсын аудит оруулах саналтай байгаагаа ярьсан. Удирдлагын зардлыг хэмнэсэн тохиолдолд гарч байгаа хэмнэлтийг нийгэмд нөлөөлөхүйц төсөлд заавал зарцуулах хэрэгтэй. Нэг үгээр олон улсын аудитын зүгээс үрэлгэн байна гэдэг нөхцөл байдлыг тавина гэж бэлдэж байна. Энэ тохиолдолд нийгмийн хариуцлагын сан байгуулах ёстой. Засгийн газар нийгэмд тулгамдаж байгаа асуудлуудыг шууд шийдэх ёстой гэсэн байдлаар яригдсан. Бидний хувьд төслүүдийн жагсаалтыг гаргаж өгнө.

Үндсэн гэрээтэй холбоотой асуудалд дундын олон улсын аудитын байгууллага ажиллах ёстой гэж бодож байгаа.

Монгол Улсыг төлөөлж байгаа төлөөлөн удирдах зөвлөлийн гишүүдийн шаардлагыг өндөрсгөх бодолтой байна. Мөн Эрдэнэс Оюутолгой компанийн чадавхийг сайжруулна. Өөрөөр хэлбэл, олон улсын хууль дүрмийн хүрээнд тоглолт хийх шаардлага зайлшгүй бий. Өнгөрсөн хугацаанд Засгийн газар дээр гарсан шийдвэрүүдэд аудит хийж үзсэн. Хууль тогтоомж зөрчигдсөн асуудал ч бий. Үүнийг хэрхэн хууль дүрмийн дагуу чиглүүлэх талаар ярилцсан. Энэ бол анхны хурал юм.

Засгийн газар ямар санал тавих нь бидний л асуудал. Учир нь бид хувьцаа эзэмшигч.

Нөгөө талд ямар санал тавих тухайн хүмүүсийн асуудал. Энэ нь ил тод байх ёстой. Засгийн газраас ямар нэгэн байдлаар улс төрчидтэй холбогдохгүй байх санал тавьсан. Ямар нэгэн байдлаар олон улсын түвшинд ил, далд сурталчилгаа хийхгүй байхыг хэлсэн. Хэрэв тэгвэл бидний итгэлцэл алдарна гэдгийг хэлж, ойлгуулсан” гэлээ.

Б.Лхам