УИХ-ын өнөөдрийн үдээс хойшхи чуулганаар Орон нутгийн сонгуулийн тухай хуулийн төслийн зарчмын зөрүүтэй саналын талаар хэлэлцэж байна.

УИХ-ын гишүүн Т.Аюурсайхан: Орон нутгийн сонгуульд нэр дэвшигчид иргэдээсээ сонгогдож байгаа. Энд авлига байхгүй гэж хэн хэлээд байгаа юм. Татварын өртэй байх ёсгүй гэдэг шаардлага тавьдаг. Бүгдэд нь нэр дэвших эрх байгаа учраас шалгуур нөхцөл байх ёстой. УИХ-ын сонгууль батлахад нэг хүнд зориулж байна гээд бөөн хэл ам гаргасан. Энэ хууль ч бас нэг хүнд зориулагдаж байгаа юм уу. Тиймээс санал хураалтыг хүчингүй болгомоор байна. Авлига, албан тушаалын гэмт хэрэг хийсэн хүн орон нутагт нэр дэвших нь л дээ. Төсөв зарцуулж байгаа хариуцлагатай байх хүмүүс шүү дээ. Нийгмийн халамж сайжруулсан нэрээр авлига өгч, хувааж идэж байна. Энэ асуудлыг зохицуулж сонгуулийн хуульдаа оруулмаар байна.

УИХ-ын дэд дарга Л.Энх-Амгалан: Гишүүд чуулганы танхимд ирье. Сонгуулийн хууль хэлэлцэж байгаа учраас өндөр ирцтэй байх ёстой.

УИХ-ын гишүүн Т.Аюурсайхан: Ирцээ бүрдүүлж байж санал хураалтаа үргэлжлүүлье. Зарим шаардлагатай заалт унаад байна. Анх удаа сонгогдсон байна уу, долоон удаа сонгогдсон байна уу хэнд ч хамаагүй. Яагаад өөдөөс зандраад байгаа юм бэ. Гишүүдээ ирц сайтай оруулаад шийдье гэсэн саналтай гишүүд ч байна шүү дээ. Ач холбогдолтой заалт ирцгүйгээр уначихлаа.

УИХ-ын гишүүн О.Баасанхүү: Улстөрчид онц, муу гэсэн хоёр л дүн авдаг. Ард түмнээрээ дүнгээ тавиулах гэж байгаа энэ үед ирц мэтийн жижиг юм яримааргүй байна. Ирц нь овоо бүрдээд байтал сүүлийн үед яачихав. Эрх барьж байгаа бол үүрэг хүлээх ёстой. 64-үүлээ сууж байгаад батлачих хууль шүү дээ. Орон нутгийн сонгуульд орох гэж байгаа хүмүүс нүд чих тавиад явж байна. Л.Энх-Амгалан дарга, та чангахан шиг хүмүүсээ дуудаач.

УИХ-ын дэд дарга Л.Энх-Амгалан: Ирц 44 гишүүн байна. Хангалттай байна шүү дээ.

Б.Лхам