УИХ-ын үдээс хойшхи чуулганаар Орон нутгийн сонгуулийн тухай хуулийн төслийн зарчмын зөрүүтэй саналыг хэлэлцэж байна. Энэ үеэр УИХ-ын гишүүн Л.Болд, Ж.Батзандан нарын гаргасан саналыг хэлэлцэв.

УИХ-ын гишүүн Х.Нямбаатар: Энэ саналыг дэмжиж болохгүй. Д.Эрдэнэбат дарга аа, та өнөөдөр ямар хөл дээрээ босчихсон юм. Хүн бүр рүү дайраад байх юм. Би дэмжихгүй гэсэн саналыг хэлж байна. Жишээлбэл, 2012 онд 21 аймгийн есөн дүүргийн Нутгийн өөрөө удирдах төлөөллийн ирц бүрдээгүй. Дахин санал хураалт явуулсан. Гэвч өмнөх эрцээсээ бүр дордсон.  Баахан зардал үрсэн шүү дээ. Мөн 2016 онд  долоон дүүргийн 293 хэсэгт ирц бүрдээгүйн улмаас бага саналаар төлөөллийн ардчилал бүрдсэн. Тиймээс миний саналыг харгалзаж үзээч.

УИХ-ын гишүүн Л.Болд: Дан ганц Л.Болд, Ж.Батзандан нар гаргасан юм биш. Улс төрийн 25 нам хамтарч ийм санал өгсөн. Ажлын хэсгийн дарга гэнэт яагаад буцаад байгааг мэдэхгүй байна. Гишүүд ээ, байнгын хороогоор зөвшилцөөд дэмжсэн саналаас ухраад байх хэрэг байхгүй. Ирц хаана байна аа. Ирцээ бүрдүүл л дээ.  

УИХ-ын гишүүн Д.Эрдэнэбат: Байнгын хороон дээр бүгдээрэ ойлголцсон. Энд зардал тооцдоггүй. Төлөөллийг бүрдүүлэх асуудал яригдаж байна. Нийт иргэдийн 50 хувь нь хүрээгүй төлөөлөгчийг яах юм. Ядаж нийт иргэдийн 50+1 байх ёстой. Хоёрдугаарт, сонгууль зохион байгуулах үүрэгтэй газар бий. Дээр нь амралтын өдөр байна гээд зарлачихсан. Ирцгүй юм чинь хэдэн хувь ч байсан хамаагүй гэж болохгүй. Сонголтын зарчим суурь ойлголт гэж бий. Үүнийг битгий зөрч гэж байгаа юм. Тиймээс дэмжих нь зүйтэй.

Б.Лхам