Харааны бэрхшээлтэй хүүхдийн 116 дугаар тусгай сургуулийн нягтлан 20 гаруй сая төгрөг хувьдаа завшсан талаар тус сургуулийн багш ажилчид өнөөдөр мэдээлэл хийлээ. Тодруулбал,"Сургуулийн санхүү хариуцсан нягтлан бодогч н.Сарантуяагийн ажиллах ур чадвар, ёс зүй, ажилтны хууль бус үйлдэл нь сургуулийн сурагчид, багш ажилчдын эрх ашгийг хохироож байна.

Нягтлан н.Сарантуяа нь 2018 оны есдүгээр сард ажилд орсноосоо ажилчдын цалинг тавихдаа 20 гаруй сая төгрөгөөр хохироосон, төсвийн мөнгөөр гэрээт бус байгууллагатай худалдан авалт хийсэн.

Ингэж хардсан шалтгаан нь ажилчдын цалингаас зөвшөөрөлгүйгээр 50-60 мянган төгрөг суутгасан. Анги даалт, тусгай сургуулийн нэмэгдлийг дур мэдэн хассан. Өнгөрсөн 2019 оны долдугаар сарын нийгмийн даатгалын шимтгэлийн дэвтрийн бичилтийг тасалдуулсан. Үүнээс болж ажилчид эрүүл мэнд, санхүүгийн үйлчилгээ авахад саад учирсан. Тиймээс 2019 оны үр дүнгийн урамшуулалыг нөхөж олгох ёстой. 

Дээрх асуудлаар үйлдвэрчний эвлэл,  БСШУЯ болон сургуулийн захиргаа, удирдлагад удаа дараа мэдэгдсэн боловч хариуцлага тооцоогүй" гэлээ. 

Тус сургууль нь 78 багш ажилчидтай бөгөөд 122 харааны бэрхшээлтэй сурагч суралцдаг юм байна.

Г.Маргад