Улсын аварга Н.Батсуурь Ч.Санжаадамба, арслан Ц.Содномдорж тэргүүтэй бөхчүүд "Улсын аварга цолтой хүн сэргээш зардаг хүнээс сэргээш аваад төлбөрийн зургаан сая төгрөгөө төлөөгүй гэсэн. Бичлэг нь бий. Эзэн нь тодорхой. Монголд Улсын аварга цолтон цөөхөн бий.  Яг хэн гэдэг аварга сэргээш авсныг тодруулах ёстой. Сэргээш Монголд хар тамхи шиг тархаж байна. Ийм байж болно гэж үү. Монголын үндэсний бөхийн холбоо яагаад шаардлагатай алхам хийхгүй байна вэ" гэдгийг мэдэгдлээ. Сэргээшийг эсэргүүцэж нэр бүхий 200 бөхчүүд Монголын Үндэсний бөхийн холбоонд шаардлага хүргүүлж байгаа аж. Тухайлбал, “Бид бүгд нэг байр суурьтай байгаа. Ид барилдаж байгаа бөхчүүдийн эрх ашиг зөрчигдөж байна. Шударга үнэнээр холбоогоо авч явах хүсэлтэй байна. Гэтэл сэргээшийн асуудалд анхаарал хандуулахгүй байна. Монгол үндэсний бөхийн холбоо гуравдугаар сараас эхлэн хуралдаагүй. Энэ хооронд зарим бөхчүүдийн нэр төртэй холбоотой асуудал олон болсон. Тиймээс шаардлагаа хүргүүлж байна" гэлээ. Үүний дараа сэтгүүлчдийн асуусан асуултад хариуллаа. 

-Холбоо та бүхний шаардлагыг хүлээж аваад шийдвэрлэх эрх зүйн чадамжтай гэж үзэж байна уу?

-2018 онд байгуулагдсан холбоо цэцдийн зөвлөлөө нэг ч удаа хуралдуулаагүй. Тиймээс яаралтай хуралдуулж, сэргээшийн шинжилгээ авдаг процессийг нарийн болгоё гэж байгаа юм. Бид маргалдагч, сөргөлдөгч тал биш. Сэргээшийн шинжилгээг Солонгосын лабораторид шинжлүүлдэг. Шаардлагатай бол хоёрдогч байгууллагаао шинжлүүлдэг.

-Сэргээшийн асуудалд зөвхөн Улсын аварга Э.Оюунболдын талаар яриад байх шиг байна?

-Ганц тэр хүний талаар яриагүй. Тэр хүнийг онцлоогүй. Цахим орчинд сэргээш хэрэглэсэн гэх 38 хүний нэр яригдаж байна лээ. Үнэн, худлыг мэдэхгүй. Үнэн бол эдгээр нэрийг яаралтай зарлах ёстой.

-Бөхчүүдийн нэр хүнд маш ихээр унаж байна. Цолоо худалдаж авч байна, давааны найраа гээд ярьдаг. Энэ бүхнийг яаж цэгцлэх бэ?

-Үндэсний бөхийн холбоо энэ асуудлыг хариуцах ёстой. Холбоо нь алдаа дутагдалтай болохоор ийм зүйл болж байна. сэргээш хэрэглэсэн бүх хүнд хууль эрх тэгш үйлчлэх ёстой.

-Сэргээшийн шинжилгээг авахдаа гаднын нөлөө ордог гэх хардлага бий. Та бүхэн ямар байр суурьтай байна вэ?

-Шинжилгээ авах бүх процессийг камераар хянадаг. Шинжилгээ авахдаа тухайн хүнд кодтой цаас өгдөг. Хэрвээ сэжигтэй зүйл байна гэж хардаж байгаа бол энэ копоор тулгаж үзээд хайнаа хагалах боломжтой.  

-Хэрвээ та бүхний шаардлагыг хүлээж авахгүй бол яах бэ?

-Цагаан сарын барилдаанд барилдахгүй байх гэсэн сонголт бий.

-Аварга Э.Оюуболд цагаан сарын барилдаанд барилдвал та бүхэн барилдах уу?

-Зөвхөн аварга Э.Оюунболдын талаар яриагүй байна. Сэргээшийн асуудал гэж ярьж байна. Дэлхий нийтээрээ үүнтэй тэмцэж байна. Жалга довоороо хуваагдах нь чухал биш.

Г.Маргад