УИХ-ын өчигдрийн чуулганаар Гэр бүлийн тухай хуулийн анхны хэлэлцүүлгийг хэлэлцлээ. Энэ үеэр гишүүд асуулт асууж, хариулт авлаа.

Д.Хаянхярваа: Гэр бүлийн салалт ихэсч байгаа талаар сөрөг зүйл их ярьж байна. Эдгээрийг хуульчилж зохицуулна гэж байхгүй. Хамгийн гол нь уламжлалт зан суртахуун, ёс суртахуунд нөлөөлөх хэрэгтэй. Тухайлбал, ЕБС-иудад гэр бүлийн тухай, хүмүүжлийн тухай нарийн судалж, зохицуулах ёстой. Миний ойлгож байгаагаар суурь хүмүүжлийн тухай ойлголт хүрэхгүй байна. Гэр бүл ямар ёс суртахуунтай байх вэ зэрэг олон зүйл дээр анхаарах ёстой. Хүүхдүүдээ яаж сурган хүмүүжүүлэх вэ, хэрхэн сургах вэ. Хоёр талын хариуцлагыг жигд тусгах хэрэгтэй. Хүүхдийг уламжлалт сэтгэлгээгээр сурган хүмүүжүүлж, түүнийг сэргээх чиглэлээр ажиллах нь зөв байх.

Д.Оюунхорол: Гэр бүлийн харилцааг зохицуулсан агуулга бүхий өөрчлөлтийн талаар өнөөдрийг хүртэл хууль орж байгаагүй юм байна лээ. Тиймээс ямар байсан дэвшил болохоор гол зүйлийг оруулж ирсэн. Эрх хууль ёсны ашиг сонирхлыг хамгаалах, хүүхэд өөрчлөх, эд хөрөнгийн харилцааг хэрхэн зохицуулах талаар оруулж ирсэн байна. Мөн гэр бүлийн үндсийг зөв тогтоох чиглэлээр оруулсан дэвшилттэй байна. Өнөөдөр Монголын гэр бүл нийгмийн амьдралд томоохон өөрчлөлт орсон. Залуу  гэрлэлтээ батлуулахгүйгээр хамтран амьдарч, гадаад залуутай суух зэрэг гэр бүлийн чөлөөтэй байдал бий болжээ. Гэр бүл дэх хүүхдийн зөрчил их гардаг боллоо. Хүүхдийн хүчирхийлэл их байна. Мөн Хүүхдийн тэтгэлгийг хугацаанд нь өгдөггүй ээж нар их болсон. Хүүхдэдээ анхаарал тавих эцэг эхчүүдийн хараа хяналт ч сул байна. Эдгээр асуудлыг Гэр бүлийн хуульд оруулах ёстой гэж үзэж байна. Учир нь статистик мэдээллээр 20 мянга гаруй залуу гэр бүл гэрлэлтээ бүртгүүлж байхад 3945 нь цуцлуулжээ. Тиймээс гэр бүлийн талаар явуулж байгаа бодлого үйлчилгээг тодорхой болгож шаардлагатай байгаагаас гадна хүүхдийн өмчийг баталгаажуулах хэрэгтэй. Өрх толгойлсон эмэгтэйчүүдийн тоо 87 мянганд хүрсэн шүү. Энэ мэт олон асуудлыг ярих шаардлагатай.

Б.Бат-Эрдэнэ: Монголын төрөөс олон бодлогын баримт бичиг баталсан байдаг. төрөөс гэр бүлийн талаар баримтлах бодлого 5, 10 жил болсон байх. Энэ талаар хийсэн зүйл байгаа юм уу. Ерөнхийлөгчийн санаачилгаар батлуулсан байдаг. Үүн дээр хэрхэн ажиллаж байгаа үнэлэлт дүгнэлт өгсөн үү. Батлагдаж байгаа хууль төрийн бодлоготой уялдах, хууль хэрэгжих бодит үндэслэл нь эдийн засгийн тооцоо судалгаа шүү дээ. Тэгэхээр энэ талаар ямар ажил хийсэн бэ. Түүнээс биш нүцгэн хууль батлаад гаргах хэрэг байхгүй. 

С.Чинзориг: Тантай санал нэг байна. Хүүхдийг багаас нь сургаж, энэ талаар сургалтын програмд нь оруулж өгөх нь зөв.

Б.Лхам