Ханиад хүрч халуурсан 0-5 настай хүүхдээ харахаар болбол тав хоногийн цалинтай чѳлѳѳ олгох тухай Эрүүл мэндийн яамнаас өнөөдөр мэдээллээ. Тодруулбал, шинэ төрлийн коронавирус нь нууц үедээ ямар нэгэн шинж тэмдэг илэрдэггүй бөгөөд энэ үедээ нэгээс нөгөөд халдварлах эрсдэл түгээмэл байгаа аж. Тиймээс ханиад хүрсэн даруйд яаралтай эмчилгээ хийлгэх, ханиад хүрч, даарахаас сэргийлж, ахуйн ариун цэврийг хангахыг анхаарууллаа. Түүнчлэн Дэлхийн эрүүл мэндийн байгууллагаас  өнөөдөр 10.00  цагт гаргасан мэдээллээр уг халдвараар  нийт 2796 хүн өвдөж, 80 хүн нас барсан байна. Уг тоог задалбал, БНХАУ-д 2761 тохиолдол, бусад улсад 35 тохиолдол бүртгэгджээ.

Харин БНХАУ-ын Эрүүл мэндийн яамны мэдээллээр 461 хүн сэхээн амьдруулах тасагт эмчлэгдсэнээс 49 иргэн бүрэн эдгэрч эмнэлгээс гарсан бол Өвөрмонголд 7, Манжуурт 2, Шилийн голд 1, Эрээнд дөрвөн  сэжигтэй тохиолдол бүртгэгдсэн гэсэн байна.

Засгийн газрын хуралдаанаар шинэ төрлийн коронавирусийн эрсдэлээс урьдчилан сэргийлэх хүрээнд 9.7 тэрбум төгрөгийг Засгийн газрын нөөц санаас гаргахаар болсон байна. Энэ мэтчилэн Засгийн газрын зүгээс яаралтай арга хэмжээг шат дараатай авч хэрэгжүүлж байгаа учир иргэдийг тайван байж, шаардлагагүй тохиодолд олон нийтийн газраар явахгүй байх, амны хаалт тогтмол хэрэглэж, гараа савандаж угаахын зэрэгцээ, олон нийтийн сэтгэл санааг үймүүлсэн ташаа мэдээлэл түгээхгүй байхыг анхаарууллаа. Хэрвээ ташаа мэдээлэл түгээвэл Зөрчлийн тухай хуулиар хариуцлага тооцохыг анхаарууллаа. 

Г.Маргад