ШИНЭ намаас “Хөтөл”-ийн цемент, шохойн үйлдвэрийг лицензтэй холбоотой асуудлаар холбогдох байгууллагуудтай нь уулзалт хийлээ.

УИХ-ын гишүүн Ж.Батзандан: “Хөтөл”-ийн цемент, шохойн үйлдвэрийг лиценз нэрээр 1.3 тэрбум төгрөгөөр хувьчилж авсан. Бүр нийслэлийн хотын төвийн жижиг газрын үнээр шүү. “Хөтөл”-ийн цемент, шохойн үйлдвэрийн бүх өр төлбөрийг төлнө гэж гэрээндээ тусгасан боловч өнөөдөр нэг ч өр төлбөр төлөөгүй. Ажилчдыг нь хөөгөөд явуулчихсан. Үйлдвэр зогсонги байдалд орсон ийм л байдалтай байна. Энэ үйлдвэрийг хувьчилснаас хойш юу сайжрав. Төрийн өмчийн бодлого, зохицуулалтын газар хууль бус хувьчлалд дүгнэлт өгөх цаг болсон. Хотын ганц үйлдвэрийг банк хувьчилж авснаас хойш ажлын байр байхгүй болсон. Үйлдвэрлэл зогсонги байдалд орж, өр нэмэгдсэн.

“Хөтөл”-ийн цемент, шохойн үйлдвэрийг буцаан авах талаар Төрийн өмчийн хорооны шийдвэр гарсан гэж ойлгож байгаа. Энэ шийдвэрээ хэзээ хэрэгжүүлэх гэж байна вэ.

ТӨБЗГ: “Хөтөл”-ийн цемент, шохойн ХК-ийг хөрөнгө оруулалтын гэрээ хийсэн, хувьчилсан асуудал 2010-2015 оны хооронд болж өрнөсөн. Засгийн газрын хэрэг эрхлэх газраас Төрийн өмчийн бодлого, зохицуулалтын газарт чиглэл өгч хувьчлалын хүрээнд уг асуудлыг нягталж, эрх зүйн зохицуулалтын талаар харьцуулж, цаашид авах бололцоотой арга хэмжээний талаар судалсан. Төрийн болон орон нутгийн өмчийн тухай хууль 1996 онд батлагдсан. Өнөөдрийг хүртэл 217 удаа нэмэлт, өөрчлөлт орсон байдаг. Амьдрал дээр хэрэгжүүлэхэд учир дутагдалтай олон цоорхойтой болсон. Энэ хууль эрх зүйн асуудлыг өөрчлөхгүйгээр цаашид нийгмийн баялгийг зөв шударгаар хувьчлах боломжгүй. Энэ хувьчлалыг хууль бус гэж үзэх хэд хэдэн үндэслэл бий. Тухайлбал, УИХ-ын болон Засгийн газрын баталсан жагсаалтад ороогүй объектыг баталсан байвал хууль бус гэж үзнэ. Тодорхой объектыг Төрийн өмчийн бодлого зохицуулалтын асуудал эрхэлсэн төрийн захиргааны байгууллагын зохих шийдвэргүй хувьчилсан бол, дуудлага худалдаа болон уралдаант шалгуурын журам зөрчсөн бол, хувьчлан авагч эд хөрөнгийн үнэ, хууль гэрээнд заасан бусад төлбөрийг гэрээний хугацаанд төлөөгүй, төлбөрийг хууль бусаар хийсэн байвал, доод үнээс доогуур үнээр худалдсан буюу хувьчлахыг зөвшөөрөөгүй эд хөрөнгө оролцуулан авсан, өгсөн байвал, хувьчлан авагчид хууль зааснаас давуу эрх олгосон. Хувьчлан авагч гэрээний үүргээ хугацаанд нь зохих ёсоор биелүүлээгүй бол хууль бус гэж үздэг. Эдгээрээс харвал тухайн үед өмч хувьчлалын хийгдсэн гэрээ хууль тогтоомжийн дагуу явагдсан байна.

УИХ-ын гишүүн Ж.Батзандан: Хувьчилж авна гэдэг бол одоо байгаа нөхцөл байдлаас нь илүү сайжруулна гэх амлалт өгч, Засгийн газартай гэрээ байгуулж авахыг хэлдэг юм. Одоо энэ үйлдвэр өмнөхөөсөө нөхцөл байдал нь дордсон байна. Гэрээний нөхцөлүүд чинь биелэгдээгүй байна. Татварын төлбөр, ажлын байр, үйлдвэрлэлийн хөрөнгө оруулалт хийх тухай байгуулсан нэг ч гэрээ биелээгүй. Худалдаа хөгжлийн банк нэртэй залилангийн байгууллага Дархан, Сэлэнгийн сав нутаг Эрдэнэт гээд маш том үйлдвэрүүдийг концесс нэрээр хулгайн аргаар дээрэмдэж авсан юм. Үүнийг Монголын ард түмэн бүгд мэдэж байгаа. Тиймээс хувьчлал нэртэй хулгайгаа зогсоо гэж шаардлага хүргүүлж байна.

Б.Лхам