Бүх нийтийн арга хэмжээг ирэх сарын 2-ны өдийг хүртэл хорих шийдвэрийг Төрийн ордон дотроос гаргасан атлаа Төрийн ордон дотор өнөөдөр үзэсгэлэн яармаг худалдаа зохион байгуулж байх юм. Гэсэн атал дээрх шийдвэрийг гаргасан, гаргахад хамжилцсан улстөрч, төрийн алба хаагчид харсан ч хараагүй юм шиг царайлан хээв нэг алхаж явна. Уг нь Улсын онцгой комиссын шийдвэрийг төрийн захиргаа, үйлчилгээний бүх байгууллагууд улс орон даяар үг дуугүй даган биелүүлэх учиртай. Гэтэл Төрийн ордноос баталсан шийдвэр нь Төрийн ордон дотор үйлчилэхгүй гээд заачихсан юм уу, бүү мэд. Хүнс хөдөө аж ахуй, хөнгөн үйлдвэрийн яамнаас Цагаан сар үзэсгэлэн худалдааг ийн зохион байгуулсан шалтгаанаа томоохон худалдааны төвүүдээр үйлчлүүлэх эрсдэлийг бууруулах үүднээс амны хаалттай хяналт дор зохион байгуулах ажил эндээс эхэлж байна гэх ухааны тайлбар ядмагханаар тайлбарласан байх юм.

Угтаа бол хүн амын нягтаршил төрийн ихэс дээдэсийн тухалж, чуулдаг Төрийн ордонд бус олон улсын худалдааны төв нэртэй захууд. Энэ ч утгаараа тэнд тавих хараа хяналтаа сайжруулж, амны хаалтын хэрэглээг нэмэгдүүлэх ёстой.

Гэтэл төрийн эрх баригчид худалдааны төвийг Төрийн ордонд ийнхүү нүүлгэж аваачсанаараа өөрсдийнхөө аюулгүй байдлыг хангах гэсэн ядмагхан арга байв уу гэж хардахаар. Учир нь яг нарийн тооцоод үзвэл, хотын А зэрэглэлд байрлах эл саарал ордонд ажилладаг хэчнээн хүний хэд нь зах, худалдааны төвийг өөрийн биеэр зорьдогийг судлаад үзвэл инээдтэй тоо гарах нь лавтай. Энэ ч утгаараа төрийн эрх баригчид саарал ордонд ажилладаг алба хаагчдыг бус харин өөрсдийгөө шинэ төрлийн коронавирусээс хамгаалах үүднээс л дээрх үзэсгэлэн худалдааг зохион байгуулсан болов уу гэж харагдахаар байна. Хамгийн энгийн хийгээд ганцхан өгүүлбэрээр хэлбэл, шинэ төрлийн коронавирусээс айсан төрийн томчууд Төрийн ордонг вакумжуулж, өөрсдөө ичээндээ бүгчих шиг болов.

Хэрвээ тэгээгүй бол нэгэнт Улсын онцгой комиссын гаргасан шийдвэр Төрийн ордонд ч гэсэн үйлчлэх ёстой биш гэж үү.  

Саарал ордонд өрнөсөн эл үйл явдлын араас “Иргэд зах руу очдог. Харин зах Дарга нар руу очдог” гэх марзан хэллэг цахим орчинд тархсан нь иргэд хэр их эгдүүцэж байгааг харуулах биз ээ. 

Г.Маргад