УИХ-ын гишүүн С.Эрдэнэ тэтгэврийн доод хэмжээг 500 мянган төгрөг болгох талаар хуулийн төсөл санаачилж, Засгийн газарт өргөн барьсан талаар бид өмнө нь мэдээлсэн.

Үүнтэй холбогдуулан ХНХ-ийн сайд С.Чинзоригоос тодруулахад "ҮАБЗ-ийн зөвлөмж гарсан. Тэтгэвэр бартцаалсан зээлийг төрөөс нэг удаа тэглэх хуулийн төсөл батлагдсан. Уг хуулийг хэрэгжүүлэх талаар холбогдох байгууллагуудтай ярилцаж байна. Мөн Эрдэнэс бонд гаргах асуудал ямар шатандаа явж байгааг асуулаа. Уг асуудлыг ойрын хугацаанд шийдвэрлэнэ. Энэ долоо хоногт Эрдэс баялгийн нөөцийг тогтоох талаар шуурхай ажиллана.

Сар шинийн баярын өмнө зээлийг тэглэхээр ажиллаж байна. Мөн Монголбанк арилжааны банкуудтай санамж бичиг байгуулна. Энэ нь ирэх сарын 3-нд тэтгэвэр нэмэгдэж олгогдохтой холбоотой. Ирэх сард олгогдох тэтгэврээс зээл татахгүй. Нэгдүгээр сарын зээл татсан асуудлыг буцаан олгоно.

Түүнчлэн одоогоор С.Эрдэнэ гишүүний өргөн барьсан хуулийн төсөл орж ирээгүй байна. Бага тэтгэвэртэй иргэдийн тэтгэврийг нэмэгдүүлэхтэй холбоотой ойлгож байна. Гэхдээ улсын төсөвт ийм хэмжээний мөнгө төсөвлөгдөөгүй учраас доод тэтгэврийг огцом өсгөнө гэдэг тэтгэвэр бодох зарчимтайгаа зөрнө. Нөгөөтээгүүр, хөдөлмөрийн хөлс үнэгүйдэх эрсдэлтэй" гэлээ.

Б.Лхам