УИХ-ын гишүүн Н.Номтойбаярыг МАН-аас гарсанд тооцов. Үндэслэл нь ёс зүйгүй үйлдэл гаргасан, намын нэр хүндийг унагаасан гэж үзжээ. Улсын ерөнхий прокурор Б.Жаргалсайхан Н.Номтойбаяр гишүүний бүрэн эрхийг түдгэлзүүлж шалгах саналаа парламентад хүргүүлсэн нь өнгөрсөн өдрүүдийн гол сэдэв байв. Халдашгүй байдлын дэд хорооноос прокурорын саналыг хүлээж авах шийдвэрийг гаргасан ч Хууль зүй болон Төрийн байгуулалтын байнгын хорооны гишүүдийн олонхи түдгэлзүүлж шалгах шаардлагагүй гэж үзсэн нь Н.Номтойбаярыг тойрсон маргааны галд тос нэмэх шалтаан болоод байв.

Гагцхүү “Н.Номтойбаяр гишүүнийг гэм буруутайг хэн ч тодорхойлоогүй. Үүнийг зөвхөн шүүх тогтооно” хэмээх ерөнхий прокурорын тайлбар хуучраагүй байхад төрөлх намынх нь Хяналтын ерөнхий хорооноос хөөх шийдвэр гаргасан нь олон хүний гайхширлыг төрүүлж байна. Угтаа бол Н.Номтойбаяр гишүүний гэм буруутай эсэхийг Хяналтын ерөнхий хорооны 14 хүн биш шүүхээс эцэслэн тогтооно. Буруутай гэж үзвэл холбогдох шийтгэл, хариуцлагыг нь ногдуулна. Үгүй бол гэм буруугүй талаарх шийдвэр бүхий дүгнэлт гаргаж  алх цохих нь шүүгч.

Гэтэл яаран хуралдаж нэр бүхий гишүүнээ намаасаа гарсан тооцох болсон шалтгааны ард эрх ашгийг томоохон зөрчил явж байна гэж явахаас өөр аргагүй юм.

Тэгээд ч Н.Номтойбаяр хэмээх хувь улстөрч намынхаа нэр хүндийг унагаасан нь үнэн л юм бол мэдээлэлд ойр байдлаа ашиглан ЖДҮ-ээс гурван хувийн зээл авч, иргэдийн боломжийг тэрбум, тэрбумаар нь хулгайлсан гишүүдийн асуудлыг ч сөхөх хэрэгтэй болж таарах нь. Концесс хэмээх өмнөх Засгийн газрын үеийн сайд нарын холбогдсон асуудал ч байна.

Өнөөдөр МАН-ын нэр хүндийг дан ганц Н.Номтойбаяр гишүүн унагаад байгаа юм биш. Эсрэгээрээ ЖДҮ-ээс зээл авсан нь ил болсон, нэр бүхий УИХ-ын гишүүд ч хамаатай.

Улсын ерөнхий прокурор Б.Энх-Амгалангийн үед яг энэ асуудлаар Г.Солтан, Д.Дамба-Очир, Л.Энхболд, Б.Ундармаа нарыг ЖДҮ-ээс хамаарал бүхий этгээддээ нэн хөнгөлөлттэй зээл авч өгсөн асуудлаар шалгах үндэслэлээр бүрэн эрхээс нь түдгэлзүүлэх саналаа хүргүүлж байсан удаатай. Байнгын хороо, чуулганы нэгдсэн хуралдаанаас бүрэн эрхийг нь түдгэлзүүлэх шаардлагагүй гэж үзсэнээс тэд бүрэн эрхтэйгээ үлдсэн.

Араас нь УИХ-ын гишүүний хамаарал бүхий Капитал банк дампуурлаа зарлаж,тэнд байршуулж байсан 340 тэрбум төгрөгийг асуудал өнөөдрийг хүртэл маргаантай яваа. Ингэж бичсэнээрээ Н.Номтойбаяр гишүүнийг зөвтгөж, МАН-ын шийдвэрийг буруутгах гэсэнгүй.

Харин намын нэр хүндийг унагаасан гэж үзэж байгаа нь үнэн л юм бол ЖДҮ-ээс зээл авч бусдын боломжийг хулгайлсан, Капитал банкны дампууралд нэр холбогдсон бусад гишүүддээ адилхан хариуцлага тооцох нь зүйн хэрэг. Олон нийт ч алга ташин хүлээж авна. МАН-ын нэр хүнд, рейтингийг өнөөдөр юу унагааж байна. Иргэдийн эгдүүцлийг юу хамгийн ихээр хүргэж байна. Дийлэнх хувьд нь ЖДҮ, Капитал банк тойрсон шүүмжлэл, хардлага жин дарна. Юу үнэн энэ л үнэн.

Гэтэл нийгмийн анхаарлын төвд орсон шүүмжлэл бүрийн араас МАН-ын Хяналтын ерөнхий хорооны хуралдаж хэн нэгнийг намаасаа гарсанд тооцсон шийдвэр гаргах замаар "гал сөнөөгч"-ийн ажил хийх болсныг юу гэж ойлгох вэ?. Хяналтын ерөнхий хороо гэдэг "гал унтаарах"-ын нэр биш, Д.Батбаатар дарга аа!

Г.Эрхэс