Оюутолгойн гэрээг сайжруулах чиглэлээр УИХ-аас тогтоол баталсны дагуу Засгийн газраас Ажлын хэсэг байгуулж, Хэрэг эрхлэх газрын дарга Л.Оюун-Эрдэнийг ахлагчаар томилсон. Энэ хүрээнд Хууль зүй, дотоод хэргийн сайд Ц.Нямдорж, Сангийн сайд Ч.Хүрэлбаатар, Уул уурхай, хүнд үйлдвэрийн сайд Д.Сумъяабазар, Эрчим хүчний сайд Ц.Даваарүрэн, Байгал орчин, аялал жуулчлалын сайд Н.Цэрэнбат нарын бүрэлдэхүүндтэй ажлын хэсэг хуралдаж, зарим асуудлыг хэлэлцжээ.

Ингэхдээ Оюу Толгойн ТУЗ-ийн гурван гишүүний шалгуурыг өндөрсгөх замаар шалгалт авах талаар ярилцжээ. Энэ талаар Засгийн газрын Хэрэг эрхлэх газрын дарга Л.Оюун-Эрдэнэ "Хувь хүний тухайд ярьмааргүй байна. Харин шалгуурыг өндөрсгөж байгаа талаар ярьж байна. Тухайлбал, гишүүдээс англи хэлний шалгалт авна. Хэлний хувьд олон улсын хэмжээнд хүлээн зөвшөөрөгдөх шаардлага хангасан байх ёстой. Зөвхөн Рио Тинто гэдэг компанитай харьцахгүй. 

Ажлын хэсэг Засгийн газарт саналаа танилцуулж байна. Сайдуудын авсан саналыг нэгтгэхэд хугацаа орно. Техникийн ажил бий. Миний бодлоор 14 хоногийн хугацаа шаардагдах болов уу гэж харж байна. Сонгон шалгаруулалтыг нээлттэй зарлах уу гэдэг зарчмын шийдвэр гаргана" гэсэн юм.

Эндээс харахад Оюу Толгойд Монголын Засгийн газрын 34 хувийг төлөөлөн суудаг гурван гишүүнээс авах, үр дүнд нь хэрхэн гарах эсэх асуудал анхаарал татаж байгаа юм. Оюу Толгойд компани Монголын талаас Н.Багабанди, Ц.Түмэнцогт, Ц.Сүхбаатар нарын гурван гишүүн суудаг. Л.Оюун-Эрдэнэ сайдын тодотгосноор дээр нэр бүхий гурван гишүүн шалгалтад тэнцсэн тохиолдолд нууцын болон ашиг сонирхлын хатуу гэрээ хийх юм. Эс бөгөөс шинээр гурван хүнийг томилох эсэх ажил Засгийн газарт ногдох нь. 

Оюу Толгойн ТУЗ-ийн гурван гишүүнээс Оюу Толгойд Монголын талыг төлөөлж хамгийн олон жил ажиллаж байгаа нь Н.Баганбанди. Тэрбээр Оюу Толгойн ТУЗ-ийг байгуулах үеэр анхны гишүүнээр томилогдож байсан нэгэн. 2013 онд чөлөөлөгдсөн ч, 2016 оны есдүгээр сард түүнийг дахин томилсон байдаг. Харин Ц.Түмэнцогтын тухайд “Эрдэнэс Монгол” компанийн захирлаар ажиллаж байгаад 2018 оны зургадугаар сард Оюу Толгойн ТУЗ-ийн гишүүнээр томилогдсон байдаг. Ц.Сүхбаатарын хувьд намтар түүх, мэдээлэл нь харьцангуй хомс нэгэн.

2010 оны 05 дугаар сараас хойш “Оюу толгой” ХХК-ийн Төлөөлөн Удирдах Зөвлөлд Монголын талаас долоон удаа, нийт 13 хүнийг томилж, чөлөөлжээ.

Г.Эрхэс