Улаанбаатар хотын Захирагчийн ажлын албанаас таван шуудай үнсийг нэг шуудай сайжруулсан шахмал түлшээр сольж, дахин боловсруулах туршилтын ажлыг энэ сараас эхлүүлжээ. Ирэх тавдугаар сар хүртэлх хэрэгжүүлэх уг ажлыг Чингэлтэй дүүргийн VII, XII, Сонгинохайрхан дүүргийн II, III хороонд зохион байгуулж байгаа юм байна. Ингэхдээ үнсийг ангилж, тээвэрлэх ажлыг зохион байгуулж, нийт 11 мянга 845 өрхийг хамруулах аж.

Швейцарийн Хөгжлийн агентлагийн санхүүжилтээр “Улаанбаатар хотын ахуйн хог хаягдлын цуглуулалт, тээвэрлэлтийн менежмент” төслийн хүрээнд уг ажлыг хийж байгаа аж. Үнс нь нүүрсэнд агуулагдах шатдаггүй нэгдэл юм. Улаанбаатар хотын хүн амын нягтаршил, гэр хороолол тэлэлтээс шалтгаалан жил бүр үнсний хэмжээ ихэсч буй. Өвлийн улиралд хотын нийт хог хаягдлын 48.2 хувийг үнсний хаягдал эзэлж байгааг албаныхан хэлж байгаа юм.

Иргэд сайжруулсан шахмал түлшнээс гарсан үнсээ хорооноос тараасан купоноор гэрийнхээ ойр байгаа сайжруулсан түлш борлуулах цэгээс таван шуудай үнс тутамд нэг шуудай сайжруулсан түлшийг урамшуулалд үнэгүй авах юм. Ингэхдээ үнсийг хөргөсний дараа шигшиж, дутуу шатсан хэсгийг болон хаягдлыг ялгасан байх, үнсээ хөргөсний дараагаар савлах, үнсийг шуудайнд дүүргэн ууталж, амыг нь сайтар боож тээвэрлэхэд бэлтгэх шаардлагатай аж.