Шинэ төрлийн коронавирусын халдварын эсрэг авах арга хэмжээний талаао өчигдөр Улсын онцгой комисс хуралдаж, Сар шинийн баярыг нийтээр тэмдэглэхгүй байх санал гаргаж, ҮАБЗ-д хүргүүлээд байгаа билээ.

Саналыг ҮАБЗ хэлэлцээд дэмжсэн тохиолдолд Ерөнхийлөгч зарлиг гаргаж баталгаажуулах юм. Тэгвэл шинэ төрлийн коронавирусын халдвараар өвчлөгсдийн тоо дэлхий нийтэд эрчимтэй нэмэгдэж буй энэ үед иргэдийн зүгээс ч гэсэн Сар шинийн баярыг өргөн дэлгэр тэмдэглэхгүй байх, гэр бүлийн хүрээнд цомхон тэмдэглэх саналыг дэмжсэн хандлагатай байна.

Мөн зарим төрийн бус байгууллага, мэргэжилтнүүдийн зүгээс хэрхэн урьдчилан сэргийлэх болон халдварын үед ямар хариу арга хэмжээ авах талаар өөрийн байр сууриа илэрхийлээд байгаа.

Дээрх төлөөллүүдийн нэг болох “Оном” сангийн тэргүүн Д.Наранбаатар өнөөдөр цахим хуудсаараа дамжуулан “Монголчууд энэ жил сар шинийн баяр тэмдэглэх шаардлагагүй. Гэр бүлийн хүрээнд ч тэмдэглэх хэрэггүй. Хэрэв Монголд халдвар бүртгэгдвэл манай эрүүл мэндийн салбарынхан зогсоож дийлэх үү. Манай улсын эрүүл мэндийн системийн хэмжээнд хэчнээн сэхээн амьдруулах ор, амьсгалуулах аппаратын хангамжтай билээ. Коронавирусийн халдвар авсан хүний тоо өдөрт 3000 орчмоор нэмэгдэж байна. Халдвар авсан хүн ямар нэг шинж тэмдэг илрээгүй байх үедээ бусдад халдвар тарааж байна. Тухайлбал, Швейцарьт цанаар гулгаж байсан халдвар тээгч олон хүнд халдвар тараасан тохиолдол гарлаа. Хятадын Засгийн газрын хамгийн том алдаа нь сар шинийн баярыг өргөн тэмдэглэсэн явдал боллоо гэж эрдэмтэд дүгнэж байна.

Мөн өчигдөр Улсын онцгой комиссын хурлаар цагаан сарыг цуцалж, гэр бүлийнхээ хүрээнд тэмдэглэ гэсэн хоёрдмол утгатай шийдвэр гаргасан. “Оном” сангийн эрдэмтдийн багийнхан энэ жил сар шинийн баярыг гэр бүлийн хүрээнд ч тэмдэглэх хэрэггүй” гэдгийг онцолсон юм.

А.Сүх