Ерөнхий сайд У.Хүрэлсүх ОХУ-д айлчлал хийх үеэрээ тус улсын өмчлөлд байсан Монгол айл, өрхүүдийн түрээслэдэг 550 гаруй орон сууцны барилгын асуудлаар ярилцсан байдаг. Тэгвэл Засгийн газрын ээлжит хуралдаанаар уг орон сууцыг тухайн айл өрхөд өмчлүүлэх шийдвэрийг гаргажээ. 

Түүнчлэн Улаанбаатар, Дархан дахь дэд станцуудын болон бусад зургаан обьектыг ОХУ-ын өмчлөлөөс Монголын төрийн өмчлөлд үнэгүй шилжүүлэхээр болсон байна. 1998 оноос хойш 550 гаруй өрх орон сууцаа хувьчилж авах өргөдөл, хүсэлтээ үе үеийн Засгийн газарт тавьсаар ирсэн энэ асуудал ийнхүү шийдэгдлээ.

Уг шийдвэрийн дагуу Төрийн өмчийн бодлого, зохицуулалтын газар хувьчлах бэлтгэлээ хангаж II улиралд Засгийн газарт танилцуулах юм. БГД-ийн хоёрдугаар хороололын XVII байр, БЗД-ийн 15 дугаар хорооллын I, VII, XI, XII, XIII байр, Дархан-Уул аймгийн Дархан сумын 22 дугаар хорооллийн III, IV байрыг “Ээрмэл” ХХК, Гаалийн ерөнхий газар, “Талх чихэр” ХХК, МУИС-ийн ажилтан, албан хаагчид болон бусад иргэн, нийт 550 гаруй өрх 1998 оноос хойш түрээслэн амьдарч байна. Ерөнхий сайд У.Хүрэлсүхийн ОХУ-д хийсэн айлчлалын үеэр дээрх байруудыг Монголын талд шилжүүлэн авахаар баримт бичигт гарын үсэг зуржээ.

С.Сүлд