Нийслэлийн мэргэжлийн хяналтын газраас сар шинийн баярыг угтаж хийсэн шалгалтын дүнг танилцуулж байна.

Хяналт шалгалтын хүрээнд нийслэлийн есөн дүүрэгт үйл ажиллагаа явуулдаг 789 аж ахуйн нэгжид хүнсний аюулгүй байдлын хангамж, хууль тогтоомжийн хэрэгжилт, болзошгүй эрсдэл аюулаас сэргийлэхээр ажиллаж байна.

Хүнсний аюулгүй байдлын хяналтын чиглэлээр хийсэн хяналт шалгалтаар 750 объектыг хамруулж, 743 зөрчил илрүүлжээ. Үүнээс 500 зөрчлийг арилгуулж, хуулийн хэрэгжилтийг хангуулах зорилгоор 11 аж аухйн нэгж, 53 заалт бүхий албан шаардага хүргүүлжээ. Улмаар зөрчил илэрсэн 35 аж ахуйн нэгжид 47 сая төгрөгийн торгууль оногдуулжээ.

Мөн хэрэглэж дуусах хугацаа, хадгалалтын хугацаа дууссан 27 нэр төрлийн 188 ширхэг 597 мянган төгрөгийн түргэн муудаж, гэмтэх бүтээгдэхүүнийг устгажээ. Түүнчлэн 248 мянган төгрөгийг хураан авч харьяа дүүргийн устгалын зөвлөлд шилжүүлсэн байна. Хаяг шошгийн зөрчилтэй банш, бууз зэрэг хоёр сая төгрөгийн бүтээгдэхүүнийг буцан авах таталт хийлгэжээ.

Барилга байгууламжид хийсэн хяналт шалгалтад “Барс” худалдааны төвийн барилга эрүүл ахуйн шаардлага хангаагүй гэж гарчээ. Мөн тахиа, гахайны мах импортолдог компаниуд тусгай бүртгэл хөтөлдөггүй зэрэг зөрчил илэрчээ. Тиймээс иргэд бараа бүтээгдэхүүн худалдан авахдаа хаяг шошигтой, хугацаа нь дуусаагүй болон орц найрлагыг сайтар харж авахыг анхааруулж байна.

Түүнчлэн нийслэлийн Засаг даргын захирамжаар ирэх гуравдугаар сарын 2-ны өдрийг хүртэл баар, цэнгээний газар, караоке, хүнсний дэлгүүрийг шөнийг 00.00 цагаас хойш үйл ажиллагаа явуулахгүй байх захирамж гарсан. Захирамжийн хүрээнд хяналт, шалгалт эрчимтэй үргэлжилж байгаа бөгөөд Чингэлтэй дүүргийн II хороонд байрлах баар, Сонгинохайрхан дүүргийн Баяннуур хүнсний дэлгүүр заасан хугацаанаас хэтрүүлж үйл ажиллагаа явуулж байжээ.

А.Сүх