Тээврийн цагдаагийн албаны алба хаагчид зургаан настай охины амийг аварчээ. Тодруулбал, тухайн охин хүнд өвчтэй байсан бөгөөд 20 минут ч тэсвэрлэж чадахааргүй байжээ. Охиныг яаралтай сэхээн амьдруулах тасагт хүргэх шаардлагатай байсан тул цагдаагийн алба хаагчид Сонгинохайрхан дүүргээс ХӨСҮТ хүртэлх замыг зохицуулж, 13 минутын дотор охин эмнэлгийг хаалгыг татаж, улмаар амьд үлдэж чаджээ.

Энэ талаар ХӨСҮТ-ийн клиник эрхэлсэн дэд захирал М.Тунсаг өөрийн цахим хуудасдаа “Хүнд өвчтэй үхлүүт байсан зургаан настай охиныг 13-хан минутанд #сэхээн амьдруулах тасагт авчрахад тусалсан Тээврийн цагдаагийн хамт олонд талархаснаа илэрхийлье.

Өчигдөр ХӨСҮТ-ийн түргэний машин Сонгинохайрхан дүүргээс хүнд өвчтэй 6 настай бяцхан охиныг сэхээн амьдруулах тасагт авчрахаар нэг талдаа цаг гаран явж байж очиж авав.

Гэвч охин сэхээнд очтолоо 20 минут ч тэсэхээргүй байсан учраас тээврийн цагдаагийн хамт олон бүрэн бүрэлдэхүүнээрээ охинд тусалж, захын гэр хорооллоос ХӨСҮТ-ийн сэхээн амьдруулах тасаг руу чиглэсэн бүх хөдөлгөөнийг зохицуулж өгсөний ачаар 13-хан минутанд охин эмнэлгийн тусламж авч энэ хорвоод үлдэж чадлаа.

Хэрэв 5 минут л хоцорсон бол бид тэр бяцхан охиныг аврах боломжгүй байлаа. Амарсайхан даргатай тээврийн цагдаагийн хамт олонд ХӨСҮТ-н эмнэлгийн тусламж үйлчилгээний хамт олон, охины ар гэрээс талархаснаа илэрхийлж, та бүхний ажил амьдралд сайн сайханыг хүсч байна” гэжээ.

А.Сүх