Засгийн газар шинэ төрлийн коронавирусын халдвартай холбогдуулан авах арга хэмжээний талаар хэлэлцлээ.

Хуралдааны талаар Шадар сайд Ө.Энхтүвшин “Ерөнхийлөгчийн зарлиг сая гарлаа. Ерөнхийлөгчийн зарлигт шинэ төрлийн коронавирусын тархалтын нөхцөл байдалтай уялдан хүн амыг урьдчилан сэргийлэх зорилгоор бэлэн байдлын зэрэглэлийг үе шаттайгаар зохион байгуулах, өвчин гарсан үед тараахгүй байх, таслан зогсоох, хорио цээрийн талаар яаралтай арга хэмжээ авах, цагаан сарын баярт зориулсан олон нийтийн хурал цуглаан, зар сурталчилгаа явуулахгүй байх, хүнээс хүнд мал амьтнаас малд тархаж байгаа өвчлөлөөс сэргийлэх зорилгоор гамшгаас хамгаалах болон бусад хууль тогтоомжид өөрчлөлт оруулах талаар чиглэл өгчээ.

Засгийн газраас шинэ төрлийн коронавирусаас урьдчилан сэргийлэх, эрсдэлийг бууруулах зорилгоор энэ сарын 13 буюу маргаашнаас эхлэн Засаг захиргаа нутаг дэвсгэрийн нэгж, төрийн байгууллага, хуулийн этгээдийг бэлэн байдлын тусгай горимд шилжүүлнэ.

Гамшигаас хамгаалах өндөржүүлсэн бэлэн байдалд шилжүүлж байгаатай холбогдвуулан болзошгүй аюулаас сэргийлэх зорилгоор хотол төгс хэмээх төмөр хулгана жилийг нийтээр тэмдэглэхгүй байх нь зүйтэй.

ДЭМБ-ын хэлж байгаагаас уг халдварын оргил үе нь болоогүй гэж үзэж байна. Оргил үе нь цагаан сарын үеэр таарч болзошгүй гэсэн тандалтыг эрдэмтэд хийсэн. Нөгөөтээгүүр, ӨМӨЗО-ны Баяннуур болон хил залгаа Шинжаан, Уйгарын өөртөө засах оронд халдварын тохиолдол бүртгэгдээд байна. Тиймээс нүүрсний тээврийг зогсоох шийдвэр УОК, Ерөнхийлөгч, Засгийн газар гаргасан.

Харин цагаан сарын баярыг гэр бүл дотроо жишээлбэл, мөрөө гаргах, гэр дотроо золгох зэргээр өнгөрүүл болно. Учир нь бүх нийтээр амардаг амралтын гурван өдрийг хөндөөгүй. Гагцхүү хөдөлгөөнийг хориглосон” гэлээ.

Б.Лхам