Зургийг Isee.mn
Ерөнхийлөгчийн бүрэн эрх, бодлого, үйл ажиллагааны хөтөлбөрөө хэрэгжүүлэхэд туслах үүрэг бүхий төрийн байгууллагын даргаар ажиллаж байсан З.Энхболд үүрэгт ажлаа хүлээлгэж өгөхөө өнөөдөр мэдэгдэв. Он дамжин яригдсан эл сэдэвтэй хамт АН-ын доторх зөрчил улам хөөрөгдөж, С.Эрдэнэ дарга байж суух газраа олж ядах болсон талаар мөн л яригдаж байв. Хэдий өөр хоорондоо ан мана үзэлцэж ирсэн намын нөхөд ирэх сонгууль болтол эв түнжинтэй байж, намаа хямралаас гаргахаар зэхэж эхэлсний дохио нь сандал ширээний эл сэлгээ байлаа.
Хааны алба халаатай, эзний алба ээлжтэй гэдэг лугаа түүний ажлаа өгөх эсэх нь цаг хугацааны асуудал байсан. Гэхдээ чухам орыг нь хэн залгамжлах бэ гэдэг хамгийн сонирхолтой өнцөг байсаар ирсэн юм. Харамсалтай нь, улс төрд нэг их танигдаагүй шинэ хүн түүнийг залгамжлах болсон нь шинэ төрлийн коронавирусийн тархалтаас илүү монголчуудын сэтгэлийг гонсойлгож, МАН-ыг баярлуулав. Энэ хүн бол Монголын хөл бөмбөгийн холбооны Ерөнхий нарийн бичгийн дарга, Ерөнхийлөгчийн ахлах зөвлөхийн орон тооны бус зөвлөх, АН-ын үндэсний бодлогын хорооны шинэ гишүүн Ө.Шижир хэмээх залуу.
2019 оны сүүлчээс эхэлсэн З.Энхболдын залгамжлагчаар хэн тодрох бэ гэдэг сунгаанд түүний нэртэй хамт Түүх, археологийн хүрээлэнгийн захирал, академич С.Чулуунаас эхлээд эрдэм номын мөр хөөж, нүд болоод оюуны хор нь гарсан цөөнгүй эрхмүүдийн нэр яригдаж байв.
Гэвч Ерөнхийлөгчийн Тамгын газрын даргаар Ерөнхийлөгч Х.Баттулгын “пи ар”-ыг хариуцаж ажилладаг гэх “шинэков”-ийг томилох болсон нь жаахан чамлалттай сонголт мэт. Учир нь хуульд болоод Тамгын газрын дүрмэнд зааснаар уг байгууллага нь төрийн тэргүүний үйл ажиллагааны аппаратыг бүхэлд нь удирдан чиглүүлж, Ерөнхийлөгчийг үнэн зөв мэдээллээр хангаж, бүх талын дэмжлэгээр хангах учиртай. Энэ утгараа уг албан тушаалд улс төр, нийгэм, эдийн засгийн өндөр туршлагатай хүн тэнцэх учиртай юм. Гэтэл Монголын хөл бөмбөгийн холбоо гэдгээс өөрөөр намтар түүх нь тодорхойгүй, яг ямар туршлагатай нь мэдэгдэхгүй шахуу буюу өөрөөр хэлбэл, нам дагасан цүнх баригчдын нэг болов уу гээд хардаад, харамлаад хэлчихэж болох нөхөр тэргүүлэх болсон нь харамсал төрүүлмээр. Нөгөөтээгүүр, Ерөнхийлөгч гал тогоогоо "хөлбөмбөгчин" залуугаас өөр хариуцуулаад үлдээчих туршлагатай, зангарагтай хүн олдоогүй юм байх даа гэж бодохоор. За алин ч бай, Ерөнхийлөгч Х.Баттулга түүнд итгэл хүлээлгэж, гал тогоогоо хариуцууллаа. Харин нам, хөлбөмбөг дагаж гүйсэн үнэнч туслах нь жор хачрыг нь хэрхэн тааруулахыг харах нь сонголт монголчууд бидэнд үлдэж байх шиг байна.
Дээрхээс гадна Ө.Шижир хэмээх залуу улс төрд цахиур хагалах, өөрийн гэсэн өнгө төрхөө бий болгох гараа нь Ерөнхийлөгчийн Тамгын газрын дарга гэх амбиц ч байж мэдэх. Энэ ч утгаараа магад АН-ынхан өөрийн шинэ залуу үеэ эртнээс улс төрийн томоохон албан тушаалд томилох замаар замыг нь засаж байж мэдэх.
Ташрамд дурдахад, Ерөнхийлөгч Х.Баттулгын зөвлөхөөр хэн хэн гэдэг эрхмүүд ажилладаг талаар танилцуулъя.
1. Д.Үүрийнтуяа- Хүний хөгжил, нийгмийн бодлогын зөвлөх
Хөнгөн Хүнсний аж үйлдвэрийн техникум төгссөн. АНУ-ын Washington DC-д манлайллын чиглэлээр мэдлэг дээшлүүлсэн. Эдийн засагч, нийгмийн удирдлагын менежер, Төрийн удирдлагын менежер мэргэжилтэй. .
- 2012 онд АН-аас УИХ-ын жагсаалтаар нэг дэвшсэн.
- Хотын дарга асан Э.Бат-Үүлийн бие төлөөлөгч,
- УИХ гишүүн С.Эрдэнийн бие төлөөлөгч, туслах,
- Баянгол дүүргийн ИТХ-ийн төлөөлөгч,
- Ашигт малтмалын хэрэг эрхлэх газрын дэд дарга,
- Ардчилсан намын ХЭГ-ын даргаар ажиллаж байсан.
2. Т.Тэгшжаргал- Гадаад бодлогын зөвлөх
ОХУ-аас БНПУ-д суугаа ЭСЯ-ны дэргэдэх дунд сургууль төгссөн. ХБНГУ-ын Потсдамын Их сургууль, Улс төр судлал, Англи хэл, соёл судлал, Захиргааны хуулийн магистр.
- Гадаад харилцааны яамны Европын газар, атташе,
- Монгол Улсаас БНПУ-д суугаа ЭСЯ, III, II нарийн бичгийн дарга,
- Гадаад харилцааны яамны Европ, Ойрхи дорнодын газар, II нарийн бичгийн дарга,
- Гадаад харилцааны яамны Бодлого төлөвлөлт, зохицуулалтын газар, дэд захирал,
- Төрийн захирагааны удирдлагын газар, захирал,
- Гадаад харилцааны яамны Америк, Ойрхи дорнод, Африкийн газар, дэд захирал зэрэг албан тушаал хашиж байсан.
3. Ц.Хулан-Соёл, шашны бодлогын зөвлөх
Монгол Улсын Соёлын гавьяат зүтгэлтэн, сэтгүүлч, утга зохиолын судлаач, шүүмжлэгч тэрбээр Төрийн төв хэвлэл “Ардын эрх” сониноос ажлын гараагаа эхэлсэн.
- “Өнөөдөр”, “Өдрийн сонин” зэрэг өдөр тутмын сониныг үүсгэн байгуулалцсан.
- “Цогт цагийн хүрдэн” Буддын соёлын төвийн санаачилгаар “Ганжуур, Данжуур, Их хөлгөн” судруудыг монгол хэл, кирилл бичигт хөрвүүлэн буулгаж буй төслийн ТУЗ-ийн гишүүн.
- Хүүхэлдэйн театрын захирал
4. Д.Пүрэвдаваа-Байгаль орчин, хот хөдөөгийн хөгжлийн бодлого, агаарын бохирдлын асуудал хариуцсан зөвлөх
Эдийн засгаар мэргэшсэн Бизнесийн Удирдлагын Бакалавр цолтой.
- “ЦЭНАН” ХХК-ийн гүйцэтгэх захирал,
- Нийслэлийн Засаг даргын Үйлдвэрлэл , экологийн асуудал хариуцсан Орлогч дарга,
- Нийслэлийн Баянзүрх дүүргийн Засаг даргаар ажиллаж байсан.
5. Г.Уянга-Иргэний нийгэм, хүний эрхийн бодлогын зөвлөх
Дорно дахины дээд сургуулийг сэтгүүлч, Хүмүүнлэгийн ухааны их сургууль орчуулагч мэргэжлээр тус тус төгссөн.
- “Ийгл” телевизэд нэвтрүүлэгч, сурвалжлагч, парламентын сурвалжлагч, редактор,
- Ардчилсан намын олон нийттэй харилцах хэлтэст,
- “Монгол таймс” “ Улс төрийн сонин”-ы эрхлэгч,
- Монгол Үндэсний Ардчилсан Намын ерөнхий нарийн бичгийн дарга,
- УИХ-ын гишүүн.
6. Ц.Эрдэнэбат- Эдийн засаг, аж үйлдвэрийн бодлогын асуудал хариуцсан зөвлөх
Улаанбаатар хотын Технологийн дээд сургууль, Сингапурт Мэдээллийн удирдлагын системч, АНУ-д Бизнесийн удирдлагын бакалавр, Денверийн Их сургуульд Олон улсын улс төр, эдийн засаг судлалын магистр.
- Монголын хөрөнгийн биржид Гадаад харилцааны референт,
- Сангийн яаманд Сангийн сайдын туслах, ахлах эдийн засагч,
- Азийн санд ахлах ажилтан,
- НҮБ-д Ази, номхон далайн бүсийн нийтлэг үйлчилгээний эксперт, нийтлэг үйлчилгээний зохицуулагч,
- АНУ дахь “Эксперт консалтинг” компанид зөвлөх, захирал,
- “Орика Монгол” компанийн гүйцэтгэх захирал, ТУЗ-ийн гишүүн
7. Э.Мөнх-Очир-зөвлөх
Бүгд Найрамдах Турк Улсын Анкара хотын Их сургууль-Турк хэл, Зах зээл судлалын хүрээлэн-Гадаад худалдааны менежер.
- Залуучууд, спорт, урлагийн хорооны дэргэдэх Соёлын төвд Видео клубын эрхлэгч,
- Монгол, Туркийн хамтарсан “Эмир” ХХК-д Ерөнхий менежер, “Хоргодоо шарга” ХХК-ийн Ерөнхий захирал,
- Нийслэлийн Баянзүрх дүүргийн Засаг дарга,
- Улаанбаатар хотын Захирагчийн ажлын албанд Аялал жуулчлалын хэлтсийн дарга,
- Нийслэлийн Баянзүрх дүүргийн Засаг дарга, Улаанбаатар хотын Ерөнхий менежер бөгөөд Захирагчийн ажлын албаны дарга,
- 2008-2012 он Монгол Улсын Их Хурлын гишүүн
- 2013-2019 он Монгол Улсаас Бүгд Найрамдах Турк Улсын Стамбул хотод суух Ерөнхий Консул
Г.Маргад
Сэтгэгдэл (28)