Йорданы нийслэл Амман хотод сонирхогчдын боксын Токиогийн зуны олимпийн наадамд оролцох эрх олгох тэмцээн дөрөв дэх өдрөө үргэлжилж байна. Өнөөдөр эрэгтэйчүүдийн 57 кг-ын жинд ДАШТ-ий хүрэл медальт, Азийн наадам, Ази тивийн аварга Э.Цэндбаатар эхний тулаанаа хийх бөгөөд учраа нь БНСУ-ын боксчин Хам Сёонг юм. 2014 оны Инчёны Азийн наадмын аварга гэдгээр нь манайхан түүнийг андахгүй.

Хам Сёонг “Рио-2016” олимпийн наадмаас хойш олон улсын тэмцээн уралдаанд ороогүй юм байна. Энэ жил улсын аварга болж, Йорданы рингэнд гарах эрхээ авчээ. Тэрээр зургаан жилийн өмнө нутагтаа болсон Азийн наадмын үеэр олимп, ДАШТ-ий мөнгөн медальт, гавьяат тамирчин Н.Төгсцогтыг луйвраар ялсан удаатай. Түүнээс хойш монгол тамирчинтай гар зөрүүлээгүй бөгөөд өнөө орой манай шилдэг ширэн бээлийтэн Э.Цэндбаатартай хэрхэн тулалдах бол хэмээн боксын хүрээнийхэн шимтэн хүлээж буй нь лавтай.

Б.Жаргал